منتديات قبيلة المهيمزات الرسمي

[poem=font="ms sans serif,6,blue,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
اغيب وابعد وانشغل واحاول انسى مانسيت=ماتنسى ذكرى السنين اللي معك قضيتها
حاولت كم مرة وكم مرة ولكن ماقويت=حتى لو ان ذكراك مامرت علي مريتها
ان كان عندك حل قلي سو كيت وسو كيت=في ذمتي ماعاد به سواه ماسويتها
وشلون وانا كل ماتطري علي مت وحييت=لو أن معي قدرة على نسيانها نسيتها
بغيت احب ايمينك الليله وخفتك واستحيت=لولا الحيا والخوف خذت ايمينك وحبيتها
ابك انت مستولي على قلبي وعقلي كمبليت=تقول كنها نامت بحبك ولا صحيتها
حتى القصيد اكتب وتطلع صورتك في كل بيت=كم من قصيدة فيك لا عد الشعر عديتها
ماهو بسيط فراق من بنيت حبه بني بيت=مرتاح من صبك لسيسانه ومن تثبيتها
ويروح في لمح البصر ويضيع منك مابنيت=وسود الليالي عقـب بيتك تدخلك في بيتهـا
وان قلت هذا واقعي رضيت ولا مارضيت=ياليت نفسي تقتنع باللي حصل ياليتها
من حظي العاثر تخيّرت ابعد الناس وهويت=والوقت قاسي والسنين العوج ماهميتها
ياليت عندي علم وش بيصير لي ولا ياليت=ثنيت رجلي من بدايتها ولا عنيتها
قلي وش آنا مستفيد من الفراق ووش لقيت=غير المشاكل والهموم اللي علي جريتها
ولا تعال انشدك وش خليت عندي ماخذيت=حتى السعادة خذتها مني ولا رديتها
ماعاد باقي كود نار جمرها منه اكتويت=وان شفتها بتموت ويموت الجمر كريتها
وانا احسبنها سالفة خلصت منها وانتهيت=وارتحت من كثرة عناها واثرني بديتها
ذبحت نفسي وبيدي حفـرت قبري مادريت=وجروح صدري كلها من خنجري لقيتها
وتبغاني انسى؟ والله ان اموت وانا مانسيت=ماتنسى ذكرى السنين اللي معك قضيتها
محبتك بتعيش في صدري وتبقى مابقيت=فالقلب زارعها ومن دم العروق اسقيتها
[/poem]