منتديات قبيلة المهيمزات الرسمي - خلقت في الدنيا واناما معـي شـي

هذه قصيده للشاعر الكبير

مبارك بن فايز البخيت السبيعي ,,

ومبارك البخيت رجل كريم و يحب الكرم وكان يستلم مرتبا لايكفي قضاء حاجته
وحاجة ابناءه وكان يصرفها كلها في القهوه و ضيافة الضيوف وكان بعض اصدقاءه
يعذلونه في ذالك وينصحونه ان يذخر شئ من مرتبه لابناءه ,,

وفي احد الايام دخل عليه جماعة من أصحابه وهو يدق البهار في النجر و صاروا ينصحونه
وأكثروا الكلام عليه فكان من هوجاسه بحديثهم وبدل ما يحط البهار بالدله حطه في براد الشاهي !!

وقال هذه القصيده :

سجه مـع الهاجـوس طبيعـةٍ لـي
طبيعةٍ بمـوت مـا جـزت منهـا

اشكي على الخلاق وارفع له ايـدي
لا كثـرت الافكـار يفـك منـهـا

اما الكرم قد فازبـه حاتـم الطـي
حتى الفرس من شان ضيفه طعنهـا

خلوني اكرم في حياتي وانـا حـي
ولا مت مدري جثتـي مـن دفنهـا

خلقت في الدنيا واناما معـي شـي
وبروح منهـا مامعـي شـي منهـا

مسكين ياللي تحسب الواجد اشـوي
والعافيه لـو تنشـرى وش ثمنهـا

يا جاهل الدنيا تراهـا كمـا الفـي
يا مخبل اللي فـي حياتـه ومنهـا

ان ناحرت لك قامت تروح واتجـي
مثل الذلول اللـي طويـلٍ رسنهـا

وان دبرت خلتـك طايـح ومرمـي
وكم واحدٍ له حاجـةٍ مـا ضمنهـا

لا بد مانرحل عن المـزح والغـي
ونسكن بيـوتٍ قبلنـا مـن سكنهـا

النفس مثل الغصن عايش على الري
ولولاه كل النـاس عافـت وطنهـا

يالله عسا الحسنات تقضي على السي
لا قربـوا للنفـس ذرعـة كفنـهـا

وسلامتكم !!