منتديات قبيلة المهيمزات الرسمي - المشيخة ماهي بشوت وملايين

قصيدة للشاعر زياد الضبيان
اتمنى تعجبكم

المشيخه ماهي بشـوت وملاييـن
وختمٍ طلـع بالواسطـه والميانـه
ولاهي بنشرالكذب وسط الدواويـن
والفخفخـه والفشخـره والخيانـه
ولاهي بنفخ الصدر عند السفاهين
وتظاهر انـه صارعنتـر زمانـه
واللي تصيقر وهو ضمن الكراوين
ختمـه ومايملـك يزيـده مهانـه
بكـره لياجـا للمواقـف براهيـن
وكلٍ علـى فعلـه يقـدم ضمانـه
تبي تكشف كل الأوضـاع وتبيـن
ويعض منهو محتـزم بـه بنانـه
لا جا التناقش وانبرى الجيم للسين
يرسب من اول يوم عند امتحانـه
ينشب لسانه فاللقاء بيـن لحييـن
ويـروح بأفـواه العـواذل لبانـه
المشيخه صبرٍ على العسر والليـن
وبذل وعطا واخلاص ذمه وامانـه
والمشيخه للـي يفـل الجناحيـن
ويضف ربعه فـي وفـاه وحنانـه
والمشيخه صد الخصوم العنيديـن
والحـزم والشـده لقـوم اللعانـه
وان ثار عج المشكله بين خصمين
يبـرك وعشـره ماتعـود ثمانـه
والمشيخه بذل الكـرم للكريميـن
وبيتٍ تعرفه قبـل لايقـال عانـه
وعطفٍ على المحتاج ومغربل الدين
وصيتٍ طغى مسكه على زعفرانـه
شيخة شرف ماهي بشيخة وراعين
شيخة كريم المجـد جـود عنانـه
حكيم ينصونـه قـرومٍ حكيميـن
يستأنسـون لحكمتـه ولبيـانـه
سوالفه تشرح صـدور الحزينيـن
والصدق والحكمه عوايـد لسانـه
مجده مورث من شيوخٍ عزيزيـن
سـاسٍ وثيـقٍ ماتزلـزل كيانـه
هـذاك لـو مايملـك إلا رياليـن
له في قلوب الناس قـدر ومكانـه
صيته يشرف عند الأدنى والأقصين
ودايم بفعل الطيب كاسـب رهانـه
لامر ذكره قالـو النـاس نعميـن
وجـهٍ يزينـه الرضـا والديانـه
يغنيك عن شوفة وجيه الشياطيـن
عبـادة الدينـار روس الخيـانـه
وش عاد لو حطو ختوم وملاييـن
مال الردي نقصٍ عليـه ومهانـه