يامنشغل عني وأنا منشغـل فيـك
أرفق على قلبن هوى العشق جابه
ارفق عليه شوي ربـي يخليـك
لا تجرحه يكفيه جـرحٍ سطابـه
جرح الزمان اللي مبعد خطاويـك
كن الزمان الذيـب والبعـد نابـه
مايرحم المسكين لو كان شاريـك
مافيه رحمه في شـروع الذيابـه
الليا تمكن ياريش العيـن يأذيـك
والليا جرح جرحه شديـدٍ عذابـه
لاكن ياعيـون المتيـم ومغليـك
اسمع كلامي وحفظه مـن كتابـه
شفت السعيد اللي بصوته يناديك
في غيبتـك كلـه همـوم وكآبـه
وشفت اليتيم اللي مولع بطاريـك
في غيبتك يبكي على حـد بابـه
خلك حنـون ولا تغيـر مباديـك
خلك على نهج النبي والصحابـه
أرفق على المحتاج والله معطيـك
شيً يفوق الوصف مـا ينحكابـه
وهذي صراحة قلبي أن كان يعينك
خذهـا أجابـه مابعدهـا أجابـه
والله لو أنـك تذبحـه مايخليـك
ما بينك وبين الخلايـق تشابـه