محاااااوره شعريه
*
رد: المحاورة بين الشاعر ( فهد النصافي ) و ( مشاعر نجد)
فهد النصافي
سلام يا أهل المنتدى اللي جزل وحضوره جزال=إسمه تفرد بالمعرفه و كلها
نادوا مشاعر نجد والدنيا نزول ٍ وأرتحال=.واللي ينوخ للحمول الكايده يشتلها
مشاعر نجد
يا مرحبا ترحيبةٍ تنقال من بنت الرجال = ترحيبةٍ تضفي على روس النوايف ظلها
جينا على حسب الوعد وان رحت ما قلنا تعال = مير الله الله فالعلوم اللي ينومس هلها
فهد النصافي
البارحة والبرق يبرق من جنوب ومن شمال=واللي يخايل للبروق يشوفها ويدلها
أثرغصين البان لاهبت هبوب الريح مال=قام يتمايل يحسب إنه كل يوم يفلها
مشاعر نجد
اثرك من اللي يرفعون انظارهم يمّ الخيال = عوج اليدين وكل قطرة في السما تحتلها
يا كثر ناسٍ ما يعرفون الحرام من الحلال = ويا قل ناسٍ تبدي الحجة وتبدي حلها
فهد النصافي
أنا تراني ما طلبتك لاجنيه ولا ريال=.السالفه بيني وبينك والحضور تحلها
الله يعينك يالبنيه والقمرغير الهلال=.إنكانها كبرت على مثلك تراني خلها
مشاعر نجد
وانا تراني ما اعتبر كثر السوالف راس مال =واللي سرت من حظ غيرك يالنصافي خلها
ما ودنا أن يطول في بعض السواليف الجدال =وصيةٍ قدّمتها واللي سمعها ملها
فهد النصافي
الظاهر إنك ما دريتي بالمسولف ويش قال=.لكن سنعها عند رجل ٍ لا قضبها تلها
اللي ورد هداج ما يدلي قصيرات الحبال=.يدلي حبال ٍ تاصل الجمه وتبرد غلها
مشاعر نجد
شرهة هل الراي وهل العرْف وكريمين الخصال=على ذلولٍ ضاع راعيها وضيّع دلها
وان كانها قامت تحث السير مع جرفٍ هيال =لا والله الا قام يرثع من بغى يا صل لها
فهد النصافي
أخذي من الدنيا مثل وأعطيك من هرجك مثال=واللي تضيع مع مراويح القطا لا علها
هاذي نصيحه طيبه والفال يقفاه العقال=.ماني وكيل ٍ عند عربان ٍ تضيع بلها
مشاعر نجد
قلنا بنلقى فالمقابل طيب ذات وطيب فال =والناس تستعرض شجاعتها ويظهر ذلها
واللي يقدم لي جواب ولا يقدم لي سؤال =ما لي ومال هروج ما اعرف كثرها من قلها
فهد النصافي
أحسن لك إنك ترغبين الظل عن لعب العيال=..لا صار ماتدرين عن دق العلوم وجلها
ما أقول فيك قصور حره كل ما جاء لك مجال=.ميرالبنادم تذهب الدنيا ولا يفطن لها
مشاعر نجد
ما احدٍ مدح واثنى على لعب العيال بكل حال= ياللي تفاخر به رح انخى ام العيال وقلها
وان طعتني لا عاد تقرب من مباريك الجمال=واخير منها لا تهاون بالفروض وصلها
فهد النصافي
ترى العيال تقال للشجعان ماهي للحثال=.أخوالعيال ليا تحيزم بالسيوف وسلها
وليا حضرنا نشرب الفنجال من صفرالدلال=.ماني سوات اللي تصلي ما احدٍ يذن لها
مشاعر نجد
يالله عسى شمسٍ تبيّن عيب مسلم للزوال =يوم انه يشوف العيوب بعينه ْوحوّل لها
والدلة اللي من مهابتها يطيح لْها العقال = قالوا حرام تحوفها يمنى الردي واتزلها
فهد النصافي
الظاهر إنك يامشاعر نجد مغويك الدلال=.ياللي تعرف الحق لاجاتك مشاعر قل لها
والا النصافي لاورد يارد على عد ٍ زلال=.ماهي سواليف الهنوف اللي تنثر فلها
|