سور الذهب والرياحي
سوار الذهب
هلا يامرحبا يامرحبا غفران وذنوب = يعبرها الضمير ولايغيرها الرياحي
ابكتبها نقط وحروف والمكتوب مكتوب = على الله هونوا ياللي تشيلون المساحي
الرياحي
يدوم الك البقا قلب الوفا ماهوب مقلوب = ليا قامت تهب الريح من كل النواحي
وقفنا للطلب لكن مادري ويش مطلوب = وش انواع الطيور وكل طيراً له جناحي
سوار الذهب
تخيّر بين صبر ايوب والا حزن يعقوب = وابا اضحك للقرون الا قرونك يالوضاحي
يابن منصور روس جبال ماهي راس عرقوب = لكن افهم على قولة صحيح القلب صاحي
الرياحي
امشيها واشوف الهيكل اللي داخل الثوب = ولا سبيت رجالاً حمى كل المراحي
والا ياطب رجلاً يشرب المويه من الكوب = مثل عباس ابن فرناس طيرها وطاحي
سوار الذهب
ياوجه الله حصاناً يمترغ وبعير مركوب = يصبحك اربعه واثنين ماابغى لك صباحي
اهل خط الصداقه سموا الحبوب حبوب = ندا والا بدا والحمل فبطون اللقاحي
الرياحي
كلاماً مايطرز بالذهب ماهوب محسوب = لكن من عند بعض الناس مايمحاه ماحي
ياعبدالله غير الدنفسه مافيك عذروب = لكن خلك كذا وابشرك مالك نجاحي
سوار الذهب
مبا نكبتك يافيصل لكنك صرت منكوب = اعرف انك على ظنك تموت بلا سلاحي
مادام أنك على المسحوب غن القاف مسحوب = يساقيك المطر والا تهب بك الرياحي
الرياحي
والا ياعزتي للي يموت ولا قضى نوب = لكن اللي يموت بعز لا مات استراحي
لكن اشوف ناساً حطوا المطروح مشعوب = ولايدرون وش صوت الهدير امن الصياحي
سوار الذهب
ياابن منصور انا ماني على خوتك مغصوب = طويلين العمار ولاطويلين السباحي
ليا قلنا بها حدة بصر في كف محجوب = لكن احلم بيوماً فيه نطلبك السماحي
الرياحي
وش اللي قربك وأنته على الاطراف محروب = وانا اشّره على اللي لبسك هذا الوشاحي
ليا صار اللسان اعوج وصار العقل منهوب = ترى الانسان ماينفع طلاق ولانكاحي
سوار الذهب
انا والحمدلله منتصب ماني بمنصوب = ولو نبغاك نشتالك على روس الرماحي
أهل وادي حنيفه حطوا الرعبوب مرعوب = ولاتشكى البسيطه من مجيي من مراحي
|