رد: تمهل رويدك
سقا الله زمانِ زال وبالذاكرة مازال
فداه العمر لو راح الأول على التالي
قبل عوايدنا نعشق السهر لاطال
معي بكل يوم وليلة أقرب من ظلالي
تنام بعيوني فارعه ماعليها شال
سترها الغلا والخوف من عين عذالي
وفجأة بلا موعد صحينا على زلزال
أخذ كل شي ولا ترك غير غربالي
بقى بيننا يمكن تواصل بقايا وصال
تجيني بعد مدة تدور عن اوصالي
مجرد سلام ومانسيتك وكيف الحال
هذا آخر الغالي وحقه وهو غالي؟
وإذا مر وقت ولا لفى منها مرسال
وبديت ألتفت عن حالها شوي في حالي
عن اللوم والشرهه رسايل علي تنهال
من ايدينها وأحسها تسولف قبالي
يقولون مايبكي على المقفيه رجال
وأنا أقول جعل قلوبهم مالها والي
على وين ماراحت أسوق القدم رحال
أخيل المدى والدرب موحش وبلحالي
أدور حدر غيمة مواعيدها همال
ولاشفت منها غير موعد مع اهمالي
خلاص انتهينا مابقى للسنين آمال
بعد ماقصرت مرسالها مات مرسالي
هي الحين صارت راعية بيت وأم عيال
وأنا الحين مثل أول على خبرها لحالي
للشاعر/ثامر شبيب الدقباسي
|