(( ياحمامه ))
روحي نويت أروح لا لا ترديـن
روحي نويت أروح ومع السلامـه
روحي كفاية جروح ما فيه بعديـن
الحين روحي وان رجعنـا ملامـه
اذا تبعتك بعد مـا فـات مسكيـن
مسكين مـا يقـدر يثبـت كلامـه
مدام صرتي في غلانـا تخونيـن
نساك قلبـي وانتـي اول غرامـه
انا عزيز النفس وانتـي تعرفيـن
ان الخضوع براي مثلـي رخامـه
لو اعتذرتي غير هالعذر عذريـن
طرتي من اقصون الغلا يا حمامه
لو كنتي أغلا شوي عندي من العين
من خانني عنـدي تحطـم مقامـه
روحي بمان الله عسى ما تعوديـن
فطمت قلبـي وأكمـل الله فطامـه
لو كنتي اول تـاج كـل المزايـن
وكنتي هوا قلبـي وكنتـي هيامـه
وكنتي غلا نفسي وحلمه بسنتيـن
وحلمن على عقلي من احلا حلامه
وكنتي هواي وكنتي اغلا المحبيـن
وكنتي هوا بالي وكنتـي مرامـه
واليوم لو انـك بجنبـي تمريـن
غلاك ما تلقيـن ربـع احترامـه
انا نسيتـك وابعـدي لا تقوليـن
حطيت من بينك وبينـي علامـه
علامـة الفرقـا وكلمـة بقوسيـن
انك ندامـه وانـك اكبـر ندامـه
والله لو زينـك عليـه البراهيـن
وأجمل جمال الكون شرقه وشامـه
خلاص في عيني فلا عاد تسويـن
طحتي من القمـة لقـاع الملامـه
خلاص لا يطريلك انـك ترديـن
مع السلامة بعدك اكبـر سلامـه
شعر: الرائع (( عادل عوض الرشيدي ))
***إضغط على الرابط لمشاهدة الكليب...***