قصيدة للشاعر:
مبارك بن فايز البخيِّت آل محمد السبيعي
وقصة هذه القصيدة كان الشاعر مبارك فايز البخيِّت السبيعي في منطقة بحرة محافظة جدة عام 1395هـ وكان بيته مفتوح لجماعته وجميع من يقصده ، وفي احد الايام سيّر عليه مسايير من جيرانه وأبناء عمومته وقاموا ينصحونه عند الكرم وكان يسوي لهم القهوة على النار ودق البهار في النجر وهوجس من كلامهم وبدل ما يحط البهار في الدلة حطه في البراد فانتبه له بعضهم فقال وش بلاك يا البخيّت عسى ما شر ؟
تراك خربت الشغلة ! .. قال : لا أنتو اللي خربتوها
وعلى اثرها قال هذه القصيدة المشهورة
سـجـه مــع الهـاجـوس طبيـعـة ٍ لـــي ّ
طبـيـعـةٍ بـامــوت مـــا جــــزت عـنـهــا
أشكـي علـى الخـلاق وارفـع لـه إيــديّ
لاكــثـــرت الأفـــكـــار يـــفـــك مــنــهــا
أمـا الـكـرم قــد فــاز بــه حـاتـم الـطـيّ
حتـى الفـرس مـن شـان ضيفـه طعنهـا
خلونـي أكــرم فــي حيـاتـي وأنــا حــيّ
ولا مــت مــدري جـثـتـي مـــن دفـنـهـا
خلقـت فـي الدنيـا وأنـا مـا مـعـي شــيّ
وبــروح منـهـا مــا مـعـي شــي مـنـهـا
مسكيـن ياللـي تحسـب الـواجـد شــويّ
والعـافـيـه لـــو تـنـشـري وش ثـمـنـهـا
يــا جـاهـل الدنـيـا تـراهـا كـمــا الـفــيّ
يــا مخـبـل الـلـي فــي حـيـاتـه ومـنـهـا
إن ناحـرت لــك قـامـت تــروح وتـجـيّ
مـثــل الـذلــول الـلــي طـويــلٍ رسـنـهـا
وإن أدبـــرت خـلـتـك طـايــح ومـرمــيّ
وكــم واحـــد ٍ لـــه حـاجــةٍ ماضمـنـهـا
لابــد مــا نـرحـل عــن الـمـزح والـغـيّ
ونسـكـن بـيــوتٍ قبـلـنـا مـــن سكـنـهـا
النفس مثل الغصن عايش علـى الـريّ
ولــولاه كــل الـنــاس عـافــت وطـنـهـا
يالله عسى الحسنات تقضي على السيّ
لا قــربــوا لـلـنـفـس ذرعــــة كـفـنـهــا