مو طبق واحد .... 4 أطبااق لذيييذه ....

اليوم جايبه لكم ...

4 أطباق سهله ولذيذه...

أول طبق...مسقعه الباذنجان بالجدر

اكله ولااا اروع وغيرت فيهاا... سويتهاا على الجوله بجدر،وعطتني نفس النتيجه

ونفس الطعم اللذيذ

مقاديرنا:

باذنجان شرايح مقلي بالزيت وممكن تدهنينه بالزيت وتشوينه بالفرن(للي ماتبي دسامه)
بطاط مقلي بالزيت وممكن تدهنينه بالزيت وتشوينه بالفرن
بصل شرايح مقلي
لحم مفروم
طماط
معجون طماط
ثوم
بهارات مشكله وفلفل اسود وملح


الطريقه:
نجيب جدر ونحط زيت ونحمس بصل صغار ليما يتشوقر نزيد الثوم المدقوق ونحمس وبعدين نضيف اللحم المفروم ، ونضيف البهارات المشكله والفلفل الاسود ونحمس واذا تغير لون اللحم وحسيتي انه قارب على الاستواء ،نضيف البطاط المقلي ونحرك بخفه عشان مايتكسر،ونضيف الباذنجان المقلي ونحرك بخفه، ونكون ضاربين بالخلاط حوالي طماطتين مع نص علبة معجون طماط ومع شوية كركم ونص قلاص ماي ، نزيده على المكونات بالجدر ونحرك شوي شوي عشان تتشرب، ونسكر الجدر ليماا نحس ان المكونات تمازجت مع بعض.

ثاني طبق...حمسة الهامبورجر مع الخضااار

حيل سهله ولذيذه بنفس الوقت ومافيهاا دسم كلش بالطريقه اللي سويتهاا فيهااا

مقاديرناا:

هامبورجر
بصل مقطع بالطول..أعواد
فلفل اخضر مقطع بالطول
طماط شرايح طوال
جزر مقطع بالطول اعواد خفيفه
بطاط مقطع اعواد بالطول خفيفه
مكعب ماجي
فلفل اسود
الصلصه:
علبة روب
ملعقة دبس الرمان
ملعقتين طحينه
فص ثوم
عصير ليمونه


الطريقه:
نشوي الهامبورجر بالفرن بدون دهن لانه راح ينزل كل الدهن اللي فيه
ونطلعه ونقطعه شرايح طوليه ونخليه على جنب
وبمقلاة نقلي البصل بزيت خفيف ليما يتغير لونه ونضيف له شرايح الجزر
والفلفل الاخضر ومكعب ماجي ونحرك .
واصابع البطاط نشويهم بالفرن بنفس طريقه الهامبورجر بس عقب ماندهنهم بشوية زيت ،واذا استوو نطلعهم ونضيفهم عالخليط ونقلب بخفه ونضيف شرايح الهامبورجر ونحرك،ونزيد شوية فلفل اسود وملح .

واذا حسيناا ان المكونات تجانست وامتزجت مع بعض نضيف آخر شي شرايح الطماط الطوليه ونقلب جم قلبه ونسكر على طول لأن مانبي الطماط ينطبخ..نبيه بطعمه بدون طبخ.

ونكون بنات مجهزين الصلصه اللي راح نحطهاا على وجه الطبق وهي عباره عن علبة روب =ملعقة دبس الرمان+ملعقتين طحينه(هرده) وعصير نص ليمونه وثومه مدقوقه.
نخلطهم مع بعض ونزين فيه وجه الطبق
وتلاحضون ان ماحطينا بهارات وايد بس فلفل اسود لان هالطبق حلاته بطعم الهامبورجر والخضار اللي معاه بدون اضافات.

الطبق الثالث اسباجيتي الربيان

المكونات:

ربيان منظف ومغسل عدل ونكون شايلين الخيط الاسود اللي بالظهر ومنقعينه بشوية ليمون عن الزفره
بصل مقطع صغار
ثوم مدقوق حوالي فصين
طماطتين مقطعات صغار
نص شدة كزبره مفرومه ناعم
نص شدة بقدونس مفرومه ناعم
علبة معجون
مكعب ماجي
فلفل اسود وبهارات مشكله وكزبره وكمون وكركم
ماي ساخن بغوري عشان نضيفه على الخلطه


الطريقه:
نسلق الربيان ربع سلقه يعني ربع فوح مع بهارات صحيحه(هيل-مسمار-فلفل اسود حب)
عقب نطلعه ونشك في كل ربيانه حوالي عودين اسباجيتي ليما نخلص
نحمس بجدر بصل بالزيت واذا تشوقر نضيف له الثوم ونحرك وعقب نضيف الطماط ونحرك ونضيف الكزبره والبقدونس ونحرك ،ونضيف نص علبة المعجون ونحرك ونحط البهارات ومكعب الماجي ونحمس
واذا حسيناا ان الخلطه ثقلت نزيد ماي ساخن حوالي ربع الجدر ونسقط اعواد الاسباجيتي المشكوكه بالربيان
ونقلب بخفه عشان الماي يوصل لكل اعواد السباجيتي،وتحاولين كل شوي تفتحين وتقلبين الاسباجيتي عشان يوصله مروق الجدر.
وعقب حوالي 25 دقيقه تطلعين الاسباااجيتي .

الطبق الرابع ميني ورق عنب حامض حلوو بدبس الرمان

مقاديرنا:

ورق عنب
عيش مصري
بقدونس
بصل مقطع صغار
ثوم حوالي 3فصوص مدقوقه ناعم
زيت زيتون
دبس الرمان
شكر

الطريقه:
نقص ورق العنب عقب مانقعناه بماي عشان تخف ملوحته لنصفين
ونجهز الحشوه اللي اهياا عباره عن عيش وبقدونس وبصل مبشور وفلفل اسود
نضيف لهاا ربع قلاص كبير زيت زيتون+ربع قلاص كبير دبس الرمان+ربع قلاص شكر
نلف ورق العنب ونصفه بالجدر اللي نكون حاطين بقاعته حلقات بطاط وبصل وجم حبة ثوم عدلين
وعقب مانصفه نسقيه بالخلطه اللي عباره عن ماي مسخنينه على النار ومذوبين فيه مكعب ماجي
واذا سقينا ورق العنب بالماي ويكون يغمره ويغطيه شوي..ونزيد على ورق العنب ربع قلاص زيت زيتون+ربع قلاص دبس الرمان+ربع قلاص شكر..وهذيله غير عن اللي حطيناهم بخلطة العيش ..ونحاول نغطي وجه الجدر بصحن عشان مايتفكك ورق العنب..واول ربع ساعه نخلي النار عاليه..وعقبهاا نخليه على نار هاديه حيل حوالي ساعه.

وبالهناااااااا والشفااااااااااا
منقول