ماهمني لو الرخوم هرجوا بي

البارحة رأسي على الكوع راكيه
يوم إن صار الضيق دوبه ودوبي

والجفن .. كن النوم للسهر حاديه
خاويت قوم من هجوس وسروا بي

ياليت حزني دمع وأضيق وأبكيه
ويا ليت حزني ذنب وأرجع وأتوبي

اللي نساني جعل ربي يجازيه
واللي ذكرني ما سلم من ذنوبي

و قلبي اللي طاوي الهم طاويه
الله كم ضاقت عليـّــه دروبي

و قرّبت من شعري وهاضت قوافيه
عليه مع بصمة كلامي إسلوبي

يا راكب اللي نازح البعد يدنيه
كنــّــه إليا روّح مراح الهبوبي

عليه من رمز الجميحي مواريه
و مطرز إسمك فيه تطريز ثوبي

جمس مخزّن ما غفل عنه راعيه
رافيه عن لعب الخنا واللعوبي

يوم إنتهى عمره وطاحت لياليه
مع باقي التركة .. شروه الجلوبي

وإشتاقه اللي طامع فيه شاريه
ما قال غالي المال فيه محسوبي

اللي حماره تقل دمّ مذكيه
من حايل يبغى بها سدّ نوبي

اللي جميحيات سقفه وعاليه
نار وشبــّـــوا في حطبها شبوبي

إليا نطحته تقل كأنك تباريه
يشبه لوجه بواردي يحوبي

كأنه إليا قفــّــى يشادي تمدريه
و ذيب يحوف البدو وقت الغروبي

من داخله شيراز بالعز كاسيه
ما خاب من يركب ثمين الركوبي

ملمس دركسونه إليا قمت تلويه
أفضل من المرعز لجاه النصوبي

وإليا إشتغل سلفه ولجـّــت محانيه
. هديره يرسل للعشاير هبوبي

وإليا مشى خطــّــه وطالت مماشيه
زما تقول معلق فوق طوبي

وإليا سرى ليله وزانت مساريه
يكشف سنا نور الشمال وجنوبي

ما يتبعه راعي المهر لأجل غاليه
لو كان يجلس طول عمره عزوبي

و ( دريوله ) لو ما لقى من يخاويه
ماهو من الطرقة جزوع هيوبي

يا سايقه تكفى وبالله تودّيه
لــ سعود بدر وخبــّــره عن شحوبي

هاك الكتاب وسلــّـم سعود بـ يديه
نبضي وضيقي بعد ما ضيقوا بي

وإلا بــ أسمــّــعك الكلام ومعانيه
غنــّــه بصوتك يوم صوتك طروبي

ودّه لــ أبو وايل قليل المشاريه
الطيب الصافي قليل العيوبي

فديته اللي ما تغيـّـر مباديه
. ما هو بــ ( ثلج ماه لأضحى يذوبي)

لا مكسبي دنيا ولا مال أبرجيه
ولا أشكى مفارق غالي ومحبوبي

يا سعود قالوا شيء ما ينحكى فيه
أهل الهروج منفــّـخين الدروبي

سفهت بعض الهرج ما كنـّـي أوحيه
يا سعود كم قالوا بعدك وحكوا بي

اللي إليا جيته كبار عزاويه
أدري إليا قفــّــيت قطــّــع جنوبي

والصاحب اللي كنت أعزه وأداريه
يحسب نجاحه مرتبط في رسوبي

يا سعود قل له لاهي عنه ناسيه
لا نيب في صوبه ولا هو بـ صوبي

خلاص دزيت الرشا من عراويه
ما همـّـني لو الرخوم هرجوا بي

ما زادني لو يمدحون المسافيه
نفضت من بعض الأوادم جيوبي

يا الله يا اللي بارد المزن ينشيه
يهلّ بأمرك وبل سيله صبوبي

تمهل لأبو وايل بعطفك وتحميه
من طعنة الغادر وهرج الكذوبي

يا سعود ما للهم شيء يداويه
إلا مواصل طيبين القلوبي

هذا قصيدي يوم تمتّ معانيه
عليه من بصمة كلامي .. إسلوبي

الله يسامحك ياجنرال تعبت وانا اقراء لاكن تستاهل

اشكرك على الاختيار الجميل وصح الله السان القايل

الجنرال
لك مني كل التحيه ع هذا الاختيار بصراحه من زمان عن الاسلوب الشعري

الي مثل هذا صح صطحي وواضحي لاكن بعيد عن الاسلوب الممل او المتكرر بالصح

تقبل مروري

صح السان شاعرها وسلمت لنا روح ناقلها ..


آختيار مميز له رونق بالابداع وتميز ..

يسلمو جنرال ع الاختيار .
ان دل انما يدل على الذائقه الرفيعه ..

تقبل مروري

مشكووووووووووورين يا جماعة