عنوان القصيدة(طيب الساس)

مشكورين على الرد وبيض الله وجيهكم

اقتباس:
المشاركة الأصلية كتبت بواسطة ابوعلي المهيمزي

انـهـض رعـــاك الله يـاطـيـب الـســاس # مـثـلـك حـــرام يـكــون هـــذا مـصـيـره!

أنصـحـك لاتـيـأس تــرى مــاورا الـيـاس # إلا الـمــآســي والــحــيــاة الــمــريــره
يابنك كيـف اصبحـت موطـن للإفـلاس؟ # وانــــت الـمـمــول لـلـبـنـوك الـكـثـيـره
وش جاك في تالي زمانـك مـن النـاس # وانـت مـعـروف ولــك سمـعـه وسـيـره
جتك السهوم تعوم مـن عـوج الأقـواس # أطـلـقـت صـرخــة لـلـمـلأ تسـتـجـيـره
وجاك الجفا ضاوي مثل لـون الأدمـاس # يطلـعـك مــن حـيـره ويـدخـلـك حـيــره
بــدل بــدل حـــراس خـزنـتـك حـــراس # وصـــارت جـمـيـع معـامـلاتـك خـطـيـره
حـبـلـك مـعـقــد ومـتـلـولـس تــلــواس # ومنحـاس وضعـك مثـل حـوس المريـره
أصبحـت بعـد البـاس ماعـاد بــك بــاس # سـيـف تــوارت سـلـتـه فـــي جـفـيـره
لـو لاح صوبـك بــرق مـاجـاك عـسـاس # يــمــرك الـطــرقــي مــانـــوخ بـعــيــره
ماعـاد بــك طمـعـه ولا فـيـك مـجـلاس # لـكـن عـســى بـالأمــر خـيــر وخـيــره
أصـبـح كـــلام الـيــل حـبــر بـقـرطـاس # يـعـيــد لــلأذهـــان قــصـــة شـهــيــره
طــق الغـبـا جمـهـاة عـبـاس فـرنــاس # واصبـح هـلاكـه مــن سبـايـب مطـيـره
غامر طناخة راس ماهي علـى سـاس # شـجـاعــة يـاجـعــل مــاهــي نــويـــره
يـاوجـد حـالـي كــل مـاهـب نسـنـاس # طـالــت بـعــد كـانــت علـيـنـا قـصـيـره
غـارت عيـون الـمـاء والأشـجـار يـبـاس # كــل رمــى دلــوه عـلــى جـــال بـيــره
وتـبـدلـت كـــل المـفـاهـيـم بـالـنــاس # وتـعــســرت كــــــل الأمـورالـيـسـيــره
هـان العـزيـز وطـالـت يـديـن الأنـجـاس # وتـوالــت النـكـبـات فـــي كـــل ديــــره
ماينـفـع المكـسـور لــو قـلــت لابـــاس # لاصــــار كــســره مـاتـضـمـه جـبــيــره
والكسـر ماهـو كـسـر واحــد ويـنـلاس # يـامــا ويـامــا مــــن عــظــام كـسـيــره
موت النفوس يهون مع موت الإحساس # الـمــوت بـالإنـسـان مــوتــت ضـمـيــره
روس الرجـال تغمغـم بحـمـر الأكـيـاس # وبالـديـن كــل شــوي تـهـدم شـعـيـره
واصبح يشكك في حديـث ابـن عبـاس # وحـديـث ابــن مسـعـود وابــي هـريـره
مـن خايـس يتـبـع لــه لشـلـة خـيـاس # يبـيـع ديـنــه لأجـــل يـرضــي دشـيــره
طول اللحـى والشكـل ماهـو بمقيـاس # وفـعــل الصـغـيـره مــوصــل للـكـبـيـره
يوجـد نصـوص ويوجـد إجـمـاع وقـيـاس # عـشـنـا وشـفـنـا بالسـنـيـن الأخـيــره
أضحـت صنـوف النـاس ثـلاثـة أجـنـاس # مـبـصـر ومستـبـصـر وضــايــع بـصـيــره
صنـف يعيـش بوضـع شايـك وحسـاس ]# صـامــد ولا يــقــدر يــواصــل مـسـيــره
أشـبــه بـحــر عـــاد بـالـوكــر قــرنــاس # إذا صعـد يصـعـد عـلـى اكـتـاف غـيـره
عــاش الحـيـاة بــلا كـرامــه ونـومــاس # مـافـيــه لاشـيـمــه ولا فــيــه غــيـــره
وصـنـف يفـيـق ليالـقـى رز أبــو كــاس # مـافـيـه غـيــر الأكـــل شـــيء يـثـيــره
الضلـع الأسـود شامـخ بيـن الأطـعـاس # وكـــل يـقــول الـضـلـع مـاحــد يــديــره
مــــن داس لابــــده بــالأيــام يــنــداس # ويـامـنــا مــثــل الــرحــى مـسـتـديـره
طـرقــت بالمـسـحـوب قـافـيـة دبـــاس # عـــــــلام مـابـالـبـيــنــه والــســـريـــره
باسمـه وذكـره ينخـزي كــل وســواس # مـايـخـذل المـسـلـم وربــــي نـصـيــره
يـامـقـدر الأقـــدار يـامـذهــب الــبــأس # يالله بـحـســن الـعـاقـبــه والـسـتـيــره

شعر/ فواز بن مريزيق المهيمزي

اخوي/ ابو علي
صح لسان الشاعر/ فواز بيض الله وجهه على هذا القصيدة الجزلة بماتحمل من معاني وحكم ونحن نشكرك على النقل الموفق ونتمنى لك التوفيق والحياة السعيدة
وتقبل فائق تحياتي

من اجمل القصائد التي قرأتها ..
حبكت شااعر هذه القصيده ... وكل بيت عن قصيده ..
اشكركـ ابوعلي على انتقاءكـ المتميز بهذا الطرحـ للشاعر فواز المهيمزي ,,
دمت بحفظ الله .

يعطيكم العافيه على المرور

يعطيكم العافي

صح لسانك ومشكور اخوي على القصيده الرائعه..