فـ لنرتقي ليرتقوا و نأخذ بـ أيديهم فـ لا يهلكوا ’’

:

صباحكم قشطه ومسائكم عسل>> مابقى إلا تجيبون خبز وتفطرون

يومياً عند كل صباح ومساء أسمع اسطوانه بشكل شبه يومي
(وينك؟؟ - ليه متأخر ؟؟ - ليه ما تذاكر؟؟ - بطل غازيات!! - لا تسهر!! - ليه تأخرت عن المسجد؟؟
وش تبي بهالمطاعم ؟؟- خفف من هالأفلام!! -ليه تحوس غرفتك ؟؟ - رتب كتبك و واوراقك ..... إلخ )

ودايم الردود نفسها تتكرر على نفس هالأسئله ..

لين استوعبت بالأخير إن ببيتنا مراهق

مره كنت ابي اروح مشوار يمكن يبعد عن بيتنا اربع دقايق بالسياره .. ركبت مع اخوي اللي يصغرني بسبع سنوات ومشينا

استغربت من الطريق ماهو اللي اعرفه اقول لأخوي وش هالطريق يقول لي وين تبين قلت للمكتبه قال خلاص مالك الا اللي يوقفك عندها
يوم شفت إلا لنا ربع ساعه ندور وانا ماني مستوعبه الوضع و ماحسيت بالوقت من السوالف .. بالأخير استوعبت إن الأخ مضيع
وبالملعونه واختها اعترف انه مايدل وحسنا لين دلينا طريق الرجعه ..

إستغربت ليه من البدايه ما قال إنه مايدل الطريق ؟؟

ليه ما سألني او سأل ابوي ؟؟

لكن إستوعبت بالأخير إني ركبت مع مراهق

مره كنت اذاكر و سهرانه باليل وكل اهل البيت بسابع نومه ما اخبر إن فيه احد صاحي وقتها بديت انعس و اكسل

رحت للمطبخ اسوي لي قهوه .. اخوي يدري إن اكبر خوافه بالبيت
سمع الصوت بالمطبخ ويوم عرف إنها أنا و يطق الشماغ ويتلثم ويخش علي على أنه حرامي
طبعاً مايحتاج اقول لكم ردة فعلي لأني وقتها ماصحيت إلا بعد ما صحى البيت كله عشان يصحوني >> طاحت غشيانه

المهم مزحه ثقيله مره لكنها ماهي شي عند " مــراهــق "

في بيتكم مراهـقـ/ـه يعني في بيتكم " قــلــق "

الأولاد والبنات بفترة المراهقه يفقدون السيطره بعض الأحيان على تصرفاتهم

من غير الإضطربات الداخليه اللي تصير لهم من بعد مرحلة البلوغ
مزاجيه متقلبه , تصرفات غريبه , افكار متذبذبه
وهي من اخطر مراحل العمر بحياة الأنسان و المنعطف اللي راح يكمل عليه غالباً بقية حياته

وضع المراهقين يزداد خطوره عام ورا عام وقابلية إنحرافه تجري بنسبه متزايده

مراهقه بـ أول ثانوي عندها [ بلاك بري + لاب توب ] ~>

مراهق بـ نفس عمر الحلوه اللي فوق عنده [ نفس اللي عند الحلوه اللي فوق + سياره ] ~>

يعني نسبة إنحرافهم تكون أعلى من نسبة مراهق بعمرهم مايملك [ نفس اللي عند الحلوين اللي فوق ]

أدري شتتكم بكلامي و أطلعكم من شي و ادخلكم بشي

لكن خلونا نخش بالجد الحين ~> كل هذا و للحين مابدت

خلوني أبدا بالشباب الحين أغلبكم عندهم أخوان بفتره المراهقه وأغلبكم مايدرون عن هوا دارهم

على إن هالمراهق محتاجك اكثر من اي شخص ثاني .. لأنك توك طالع من هالمرحله واكيد بتفهم تفكيره و تصرفاته
ولأنك خارج دائرة هالمرحله يعني فيه إتزان ذاتي عالي وتقدر توجهه التوجيه السليم
مين منكم مسك أخوه و سأله عن المشاكل اللي يواجها و تحصل له ؟؟... مين اعطى اخوه الأمان ليكون صندوق اسراره ؟؟
يعني ابعد واحد من اصدقائك لو يجي يشكي لك من مشكله طايح فيها بتحتويه وتسمع له وتنصحه و تتابعه
لكن بالمقابل لو هو أخوك اللي طايح بنفس المشكله بتعاتبه وتعاقبه و تسكرها عليه
" الأغلبيه وليس الكل >> عشان ماتقولون عني عنصريه

"

هو محتاج إحتوائك حنانك و أهم شي " أمانك "

فـ لا تبخل عليه بهن

نجي للصبايا الدميلات ~>

يمكن بتوسع بالكلام عن البنات اكثر بحكم إني بقلب الحدث مو زي العيال مدري تروح على أيش مراهقتهم

البنت بهالمرحله تبدا تبحث عن الإشباع العاطفي " من بنت من ولد أهم شي تحب وتنحب "
غالباً بنسبة 95% بتسلك الطريق الخاطئ .. بوجود الجوال و النت و صديقات السؤ اللي تصادفهن بكل مكان
هنا يبدا دوري كـ أخت .. البنت إذا حصلت على إهتمام و إشباع عاطفي + " ثقه موضوعه تحت المجهر "ما راح تغلط ~> وهنا دورنا
نعطيها إهتمامنا نسألها عن تفاصيل احداث يومها وعن الأشياء اللي تضايقها وعن المشاكل اللي تواجها
نحسسها بـ أنها قادره إنها تحكي لنا كل شي بلا قيود عشان ما تلجئ للشخص الغلط نبين لها إهتمامنا وحرصنا عليها
أهم شي نحرص على التهذيب العاطفي لأن اغلب مشاكل المراهقات تكون عاطفيه بشكل مباشر او غير مباشر
نثقفها بالتجارب اللي مرت علينا بفترة المراهقه نحسسها بـ إستقرارها الذاتي
و النقطه الأكثر اهميه إننا نعطيها الثقه التامه وليست الثقه العمياء
لأننا مجتمع يا نعطي الحريه الكامله يا نحجر على الشخص ونكتم نفسه ~>محرومين من الوسطيه

:: خلاصة القول ::

فـ لنرتقي ليرتقوا

و نأخذ بـ أيديهم فـ لا يهلكوا

" لوجهة نظركم مذاق مختلف "

ودي