الى متى في سكة الياس ماشين

==========
ياطير طرت ورحت اتابعك بالعين
لين اختفيت مسندٍ للمخيله

خليتني وادويت عبر الفضا لين
حسدك قلب الحزن والله وكيله

حريتك تعطيك فالعسر واللين
وانا اترقب فالرجوم الطويله

ياليتلي مثلك طير وجناحين
وان ضاقبي دار(ن) كفخت لبديله

لكن انا تايه بليا عناوين
واطلب كثير(ن)ما حصلي قليله

اسج رجلي بس مدري على وين
ومليت مشي السكه المستحيله

الى متى في سكة الياس ماشين
وايامنا دايم علينا بخيله

كملي وانا ادمح في خطايا المحبين
ما طاب جرحٍ في ضلوعي مقيله

والشعر علمنيه جور المقفين
والا الجروح اللي بصدري غليله

اصيح ابي حل السؤال ببراهين
والحل لازم ينكتبله دليله

لكن على الله كل شيٍ وله حين
لابدها في يوم تطف الفتيله

اللي بنار الوجد ترقا الشرايين
والها مع الدم المسند فصيله

والوقت ظالم والاوادم غريبين
مايوم صار العدل من غير مَيله

احدن يزودله على الثلث ثلثين
واحدن يهيم وشقوته هي حصيله

اقول شعري واسمعو يالثقلين
مانيب مشايٍ بدرب الرذيله

حتى ولو الجرح بي صار جرحين
ماعفت صعب ارغم عزومي واجيله

بالشعر اغني غير طرق المغنين
ولا اتغنى بالبيوت الهزيله

يكفيني اني من رجالٍ عزيزين
ناسٍ ليا حمي الوغى ترتكيله

بالعقل والا بالتحام الحديدين
مايلزم الموقف نحطه وسيله