مــــا يــذبـــحـــك

دار الهوى فوق الشجر باندراجــــــه
وناهــجـــوســـي تتبعه كـل مـــــاراج
القلب نسمات العليل ابتهاجـــــــــــــه
والفكـــر خلته الدواكيــك مسهــــــاج
فج خلى لاضاق صدرك علاجـــــــــه
يغنيك عن بعض المجالس والازعــاج
سحابة البارح قفتها عجاجـــــــــــــه
يلعب بها صلف الهوى مثل الامـــواج
هبت هبوب مدورين اللجاجــــــــــــه
يـــفـــرح بزلــة صاحبه كــل هـــــراج
من غير سبه عاقدن لك حجاجــــــه
لو ان مــالــه مع هل الطيب منهـــــاج
اثر العوج دايم يحب العواجـــــــــــه
لو يــــنعدل يـــرجع لساسه وينعــــاج
مايستوي طعم القراح وهماجـــــــه
ولايــــستوي نقــع الصفا مثل هــــداج
الله ولامنت محسب خراجـــــــــــــــه
شين اللقا ومــن البطر لابسن تــــــاج
والله مايذبحك ياكود حاجـــــــــــــــه
لاصـــار في وجــهك حيا ونت محتــاج
للعسر يسر وللهموم انفراجـــــــــه
يجي لها من والي العرش منهــــــاج
ارفع يدينك للسماء ثم ناجــــــــــــه
يظهرك لو ان دونك شرابيك وسياج


كلمات الشاعر: مجعد بن متعب الرشيدي