محاورة بين فوزان بن عوض الرشيدي وعبدالرحمن المطيري

عبدالرحمن المطيري

سلامي عد هتان المطر لربوعـي المطـران

وعلى باقي النشاما الحاظره مليون ترحيبـه

انا ناويك نيه وان بغيت الصـدق يافـوزان

مصيبه لان ذبحتك وان تركتك برضوه مصيبه

فوزان

ياهلا يامرحبا ترحيبة المطران في المطران

ليامرالمطيري صاحبن رحب به صحيبـه

وانا ماني بكيف مقطعين الروس بالخليان

ولاني من ينزل محزمه والفرد في جيبـه

عبدالرحمن

حزامك مايفكك لو يجون الانس واهل الجان

اشوف اللي سواتك ماعرف قدره وترتيبـه

علامك يابن مربح بالطريق تعارض الغزلان

انا خابـرك رجـال تـود العلـم وتجيبـه

فوزان

يابن متروك لوتتركني احسن لك وانا فوزان

كثير الناس بينـا عليـه الشـك والريبـه

علومك لاتسولفها على العرجان والحـولان

يصدق الردي وتحسف الطيب علـى طيبـه

عبدالرحمن

انا بيني وبينك لعـب والميـدان ياحميـدان

واشوفك يابن مربح قمت تخطي العلم وتصيبه

اسالك عن خفاي موقفك في محكمـة عمـان

تعكر نبعك الصافي بعـد صفيـت مشاريبـه

فوزان

انا خابرك رجال تبـي حريـة النسـوان

تصوت للقرار ومـا توصابـه توصيبـه

على هونك تراك بدولة االاسعود والاخوان

رقبة السيف شامان انتبه تقرب تلابيبـه

عبدالرحمن

انا شاعر وصادق وطيب ولي عنـوان

واخاف انه لاطاح الجمل تكثر عذاريبه

ابثبت في محلي لين ارجح كفة الميزان

لان الحر لمنه نـوا حقـق مطاليبـه

فوزان

انا مدري من الرابح وانا مدري من الخسران

ولاني فاهمن بعض الكلام اللي تهـذري بـه

حقيقه حر واوصافه ماهي مع طير ابن برمان

واعرف الحر لامنه طلـع صـادة مخاليبـه

عبدالرحمن

تقوله وانته محامي لابـو هنـود والافغـان

لاشفته حضر فزيت من قلبـك تهلـي بـه

ترى المضمون شي جربه من حولنا الجيران

ولو به عيب بين في ضحى جيرانـا عيبـه

فوزان

يقال الفيل اله خرطوم والخرطوم بالسودان

وحكام الرجال السود مدري وش تسوي به

ترى نارك يابن متروك نار مالها دخـان

ياحلم الليل سر الليل عنا وانتف الشيبـه

عبدالرحمن

واان اشوف النمر باسمه تسمى نمر ابن عدوان

اساليبـه كثيـره والشجاعـه مـن اساليـبـه

ونار الحشر سوداء كان تسالني عـن الالـوان

اســال الله باسمـائـه يكفيـنـا ملاهيـبـه

فوزان

تسمى بالاسامي كلها واستنجـد الشـران

انا عمق البحر ينظر له السبـاح ويهيبـه

تبى تشري بقيمة غاليه وتبيـع بالمجـان

على شان تحلف ماتبيع في شوقي وتشريبه

عبدالرحمن

الياصرتوا عرب تاتحبسون الذيب بالدكان

بورد القدر درب قبـل مانتـه بضاريبـه

بحور تهلك الراوي ولاكن تروي العطشان

وان جاها الابن ادم يشتكي حشة عراقيبه

فوزان

لياصرتوا بديون ترفعون البيت بالعمدان

ولياجته الرياح العاتيه شالـة مناسيبـه

وانا ماني مروح لين قدمي تخلي المرحان

واخضك يالغدير اللي تزارقبه دغالايبـه

عبدالرحمن

انا اوحيت الاسامي كلها ماعجبني الا فلان

وبحرك اللي تقوله عارفه من قبل تجريبـه

سواتك رجل واعي بس حضه طايح وبلشان

بلش مابين تسحيب العباه وفتـل اشانيبـه

فوزان

تقـدا يالمطيـري لاتقـدي دربـك العميـان

عيونـك فيـك لايعطونـك الباكـور تمشيبـه

ترى عيب العيون اللي مصابه في عمى الالوان

لاحـط الهـدف لونيـن ماتحسـن مضاريبـه

عبدالرحمن

تقدينا نعاره جبتهـا مـن مصنـع الجـدان

وعقل قـدم خلـق الله لاضاقـت نماريبـه

هذا انت تشوف بعيونك ولاكن عقلك التعبان

ومثلك يابن مربح كيف مدري ويش اسويبه

فوزان

رفيقي عارفه من روس قوم تبـرح الريعـان

على روس الشواهد يسحب الصاحب مصاحيبه

ولكـن ان افـت العقـل ابليـس والنسيـان

وانا مامـد حبـل لرفيـق ابليـس يوميبـه