مع هجعه الي

]

]

مع هجعة اللي يختفون أول الليـل=الغايبـه دايـم يغيـبـون معـهـا

النفـس تاقـت للسمـر والتعاليـل=والعين أشوف النوم خالف سنعهـا

وطاب الجلوس بجانب النار ياشعيل=وحط الحطب في ترعة ٍ من ترعها

وإليا استوى للجمر فيهـا دحاميـل=وأقبـل تواهجهـا وقفـى ولعهـا

درج على المحماس من غير تعجيل=بريـة ٍ دوب اليمـانـي قطعـهـا
أول قطاف سفـوح شـم الأقاذيـل=اللي جذا حوم الوحش عن فرعهـا
شـم يساقيـه السحـاب بهماليـل=ليـن يتحـدر سيلهـا مـع تلعهـا
وترى لحمستهـا نظـام ودواليـل=وشريعة يمشى بأثر مـن شرعهـا
أول بدايتهـا مـدافـع مخالـيـل=ومسرى جماميل ٍ بغالـي سلعهـا
وسوق ٍ كما سوق الجمال المحاميل=مازال حموى النـار ماقـد لذعهـا
وإليا تطلق مـن شذاهـا زعاجيـل=وبشت عرق واللون الأشقر نشعها
فالحال سهلها عن النـار تسهيـل=حتى لظى المحماس مـا يدّرعهـا
وغير لها يا شعيل مسرى الجماميل=بطـراد زلبـات ٍ تزايـد فزعـهـا
تدريجة الحيـران ومطـارد الخيـل=هـذي طريقـة حمسهـا واتبعهـا
وعقبه تميلها على النجـر تمييـل=جذاب روس القوم مـن منتجعهـا
عوايد له من على سالـف الجيـل=ماهـي حديثـه تونـا نبتدعـهـا
ومن يوم تنعمها فـدوك الدعابيـل=فوق أصهب اللون الربيب تهزعهـا
وتضبط قياس الماء لها بالمكاييـل=ضبط الخبير لصنعـة ٍ مخترعهـا
ومن يوم تقطع خلها مثل مـا قيـل=ترخي على هدفى السبيل مخذعهـا
مبهارة ٍ تذعـر بغالـي التشاكيـل=طب العمـاس إليـا تيسـر تبعهـا
صفرا كما القنديل حسنـا تعازيـل=من صنعة رسـلان الأول صنعهـا
إليا دارها اللي يعتنـي بالمعاميـل=وفاحت وبالفنجـال الأول ردعهـا
وفيها تساوت خنة البـن والهيـل=والنفـس دافعهـا عليهـا دفعهـا
قم صب لي ياشعيل منهـا فناجيـل=على سنـا ضـوء تهـادى ولعهـا
أظنهـا يامـال طـول التماهـيـل=تقلع همومـي كـان ربـي قلعهـا
وتفتح لها أبواب بصـدري مقافيـل=وتجمع لي أفكار ٍ تشتـت ضيعهـا
وآخذ بها عن ضيقت البال تبديـل=وصروف دنيا ما مشت مع سنعهـا
دنيـا تصيـد بالشبـك والمحابيـل=ناس تسايرهـا ونـاس تخدعهـا
أحد تجي له بالرضـا والتساهيـل=وهو لو تعب في جمعها ما جمعهـا
وأحـد ركابـه مقفيـات ٍ مقابيـل=ولابـاب والا نافـذة مـا قرعهـا
وتعطيه قاف إليا طمع بالمواصيـل=وينكف معيف وسامح ٍ من طمعهـا
دنيـا تقـذل سبـق الحـر تقذيـل=وتوهنه فـي ربعـة ٍ مـن ربعهـا
لو قد مضى له من شقاها غرابيـل=يوم الحرايـب مظلمـات ٍ قطعهـا
يوم الطلوع ابها على الهجن والخيل=ما قد فهق عن طلعت ٍ مـا طلعهـا
ويوم استقرت وأغدقت بالمحاصيـل=صـارت منافعهـا لمـن لا نفعهـا
عقبانهـا تمسـي قوايـا مواجيـل=والمستفيد غرابهـا مـع مرعهـا
واللي مسـار أمورهـم بالبراطيـل=واللي متى ما وافقـت لـه بلعهـا
ومن ذاق در المرزمـات الأباهيـل=أمـا حلبهـا حلـب وإلا رضعهـا
وحصنيها يرقص على هزت الذيـل=ولو يجتمع قدمه سبـاع ٍ سبعهـا
ولا عندنا ياشعيل للعـوج تعديـل=مازال ممشاها على العـدل أطعهـا
وإن شفتها قامت تجانف على الميل=بأردى ثمن عند أول السـوم بعهـا
واستثن منها قومت ٍ بآخـر الليـل=في حـزة ٍ كـل ٍ يحـب يهجعهـا
إليا جاء لثلث الليل الآخـر تراتيـل=وقامت ملائكة الرضا قمـت معهـا
في ساعـة ٍ تكبيرهـا والتهاليـل=يجنى ثمار عذوقهـا مـن زرعهـا
وخل اجتماعك بالرجـال الحلاحيـل=اللـي خيـار المجتمـع مجتمعهـا
ولا تبدي الشكوى ولو ضامك الشيل=الا علـى رجـل يحـس بوجعهـا
رجل إليا التفـت عليـك النشابيـل=أمـا شبرهـا شبـر وإلا ذرعهـا
واختار مفتاح ٍ للأريـاء المقافيـل=روس العلا يرقيـك فـي مرتفعهـا
ومن الزمان اخذ العبر بالرحاحيـل=اللـي منازلهـم تهـاوى بقعـهـا
يافجعتي لاجيت بعـض المداهيـل=ولا شفت فيها عقب حـي ٍ رتعهـا
إلا رسـوم دارسـات ٍ مسامـيـل=وخرايم ٍ يزمى السـراب بشمعهـا
بلاقـع ٍ شهـب ٍ تهـاوى زهاليـل=ألظّاهر أن اللـي فجعنـي فجعهـا
من عقب أهلها لو سقتها المخاييـل=مالله نفعهـا وبركتـهـا نزعـهـا
لاجيتها جضيت مـن قلـة الحيـل=ودنياي عندي ضاق بـي متسعهـا
علـى حلاحيـل تضـد الرجاجيـل=حصن ٍ ماعـاد إلامقالـع شيعهـا
السته اللي يستحقون تفضيل = النفس وين أرضٍ بعدهم تسعها
عاشوا على الدنيا كما رافد النيل=بنفوس ما سيطر عليها جشعها
ولا قلت قولٍ مامعي منه تذبيل=يا مذيعها للناس إخذها وأذعها
وحق القبايل ما أعترض له بتقليل=الناس ما أظلمها ولا أنقص وزعها
فيهم مشاكيلٍ وفينا مشاكيل=ياما من الأخيار معنا ومعها

]