خوة رشيدي

السلام عليكم ورحمة الله وبركاته
أسعد الله أيامكم بكل خير أيها الأحباء الغالين
قصيده اعجبتني
للشاعر الراقي /عبدربه العتيبي
أتمنى ان تنال إعجابكم وتروي عطش ذائقتكم الشعرية الراقية

[poem=font="mudir mt,6,black,bold,normal" bkcolor="transparent" bkimage="" border="inset,8,burlywood" type=2 line=0 align=center use=ex num="0,black""]
علاك الله وأمانِه ياقصيدي=من الزلات وهروج البليدي

أبا أبدع بك طروقٍ سامرية=لحنها يجذب اللي من بعيدي

ماغناّها عبادي وأبو نورة=ولا خالد ولا عبد المجيدي

لكنك لا تفشّلني دخيلك=تراني معتبرك أغلى رصيدي

ما أباك من المعاني هرج فاضي=ولا عذرٍ لمن يطلب جديدي

أباك تصير ذخرٍ لاعدمتك=وسيفٍ مثل سيف ابن الوليدي

وأباك ليا نشدني عنك خيِّر=تفيده كان يبغا يستفيدي

تفيده بالحكم وألاّ النصايح=وعطه العلم والراي السديدي

وقلّه ياولد دنياك هاذي=تراها مثل تكوين الجليدي

لعنها الله وأبغضها رسوله=ياكم فيها شقي وكم سعيدي؟‍!

مايمدحها سوى رجَّال جاهل=يجمّعها لعله مايفيدي

ولا منّك طلبته شئ عيَّا=شحيحٍ ما يمد ألاَّ الزهيدي

عن الماجوب ماغير ايتدسّس=وعلى الغرّات شيطانٍ مريدي

سوات الحصني اللي طول عمره=يروّغ لا يصاد ولا يصيدي!

وحكيم العقل يعرف خاتمتها=تواعدنا وتكذب في الوعيدي

متاعٍ عند خلق الله موقَّت=كما وقتٍ يجي فيه الزبيدي

مافيها غير ثنتينٍ خيارا=وثالثهن ترى ماهوب أكيدي

ذكر ربي ومحبوبه محمَّد=هي أفضل شئ في دنيا العبيدي

وثالثهن ليا ماخاب ظنّي=مخوّة طيّب الأصل الفريدي

هذاك اللي يعزّك مايذلّك=لاصارت خوّته خوّة رشيدي!!

بدون قصور في باق القبائل=هل الطالات والفعل الحميدي

هذا عرفي وما يمليه رايي=وعرفي كان ما ينقص يزيدي

لكنه مايزيد اعن العوارف=أنا أردا واحدٍ عرف وقصيدي

أقوله ماعليّ من الملامة=أنا أعرف وش رداي ووّيش جيدي

ولا أخشى من فلان ولا فلاني=ولا أناديه ياعمي ياسيدي!

ما أخاف ألا من الخلاّق وحده=غفور الذنب وعقابه شديدي

ترا هاذي نصيحة واقبلوها=مادام الموت في حبل الوريدي

وخير القول كله طاعة الله=ياويل اللي عن اكتابه يحيدي
[/poem]

وسلامة قلوبكم
وصح الله لسنان الشاعر الراقي /عبدربه العتيبي مدد لاعدد