ماعشقت من الرجال الإ ثـلاثه ابــوي وظـله وعــكس مرآيته

جيت المكان الي قبل نلتقي فيه
وضاقت علي الارض ساعت ذكرته




ماكان لي نيه أجي في حراويه
بس الصدف جابته قدمي وزرته




وقفت اطالع كل حاجه واناديه
وسمعت صوتي من صداه ونكرته


حتى بعد صوتي نكرته وأنا أغليه
كله لجل صوتٍ هجر ما هجرته




وقمت أتذكر فـ الزمان وبلاويه
الي كسرني ولا أنا ما كسرته



هناك أذكر كانت ايدي بيديه
الله من ليلٍ بقربه سهرته




أفرشله ذراعي وجفني يغطيه
وشوقي ليا من فاض عنده نثرته



اللي يبي مني أسوي .. أسويه
ياما كسره الوقت كسر وجبرته




أجمل ليالي العمر كانت لياليه
خسرت كل حاجه بليلة خسرته




وهناك راح ولا طلبني أخاويه
وهناك أنا سنتين ضاعت نطرته




أقفى وأنا ما قلت له مقفيٍ ليه
ليته تعذر بأي عذر وعذرته




لكن أمانه يالمكان ومبانيه
كانه مع الأيام جاك ونظرته




قله يقول الي تعب من طواريه
الموت كنك في يديك إختصرته



وقله بعد من راح وراحت لياليه
كل شي أحبه في حياتي خسرته