نصيحه في قصيده شعريه

يا باغي العليا لهـا عشـرة ابنـود

سجل و انا بمليـك و احفـظ عددهـا

من شان مايلحقك عيبـن و منقـود

احفظ وصاتي و الوصـاه اعتمدهـا

اوصيك قبل الجسم يدبي بـه الـدود

في حفرةٍ لابـد نسكـن لحدهـا

دنيا العنا فيهـا مشاريـب وعـدود

وكم واحدٍ له حاجةٍ ما وجدهـا

عليك بالتقوى ترا العمـر محـدود

و اردع هوى النفس الدنيّـه و قدهـا

و احفظ صلاتك تكسب الرزق و الفود

تكسب مكاسيـب الحيـاه و سعدهـا

و صوم الشهر و زكّ يالشامخ الطود

ترا البيـوت النايفـه مـن عمدهـا

وجالس هل التوحيد والعز والجـود

و اتـرك مقاريـد العبـاد وقردهـا

اللي على التفريق ياتونـك حشـود

فصيلةٍ دبّ الجهـل فـي جسدهـا

و احسن جوار الجار لو كان مقـرود

و للجـار نفسـك لاتبيّـن نكدهـا

والضيف عطه الطيب والطيب مردود

اكسـب جنـاب الطيّبيـن و سندهـا

عقب الشّحم والبـنّ قدّم لـه العـود

حيثك من اللي مـن لفاهـا حمدهـا

وبنت الردي لو هي زلالٍ وقرهـود

حـذراك تقربهـا و تمسـك بيدهـا

خذ بنت قرم ٍعند الاجواد محمـود

لا جا نهار الهـوش بيّـن ولدهـا

وزلة رفيقك لالفـت دون مقصـود

لاتمسـك الزلـه و هـو ماقصدهـا

ثـلاث مرّرهـا ولا شـكّ بشهـود

والرابعه شـبّ الحطـب لاوردهـا

هذي عشر و إن كـان تبغينـي آزود

سجّـل على عشر الوصايـا وزدهـا

الظلم شين و تالـي الظلـم مـردود

و الغيظ شيطـان القلـوب و كبدهـا

و الصمت زينه والحكي سيف محدود

و الحقـد غيمـه والتباغـظ بردهـا

فكر و ميّز و اعرف البيض و السـود

و احذر قلوب الحاسديـن و حسدهـا

ياخوك بين الناس طـارد و مطـرود

ماتجهلك بعـض الحـرار و هددهـا

وان ضامتك دنياك واصبحت مضهود

فاطلب من المولـى يحلـل عقدهـا

الواحد اللـي كل ابونا لـه سجـود

اللي جميع اعمـال خلقـه رصدهـا

هذي نصيحه وانت معطيني وعـود

واهل الوفى والعرف توفي وعدهـا

قدمتها بالمسـك والطيـب و العـود

زرعتها لك زرع و انـت تحصدهـا

حمّيتها مـن دون ملح و بـارود

خوف ٍ عليهـا المنتقـد ينتقدهـا

و ختامها العليا لها شـروط و بنـود

ياللـي تبـا العليـا تمعّـن وعدهـا