اما تجي بإحراج وتروح بإحراج/ زعل الرشيدي

اما تجي بإحراج وتروح بإحراج
وإلاتثمن جيتك وتحشمها
ولاتصير دون الحق باب ومزلاج
والقومه الى ترفع الراس قمها
وخلك عزيز النفس في كل منهاج
وإن مرتك فرصة زمان أغتنمها
والكلمه الى مابها طب وعلاج
المحترم يهينها ما احترمها
ومن لارقا في بيض الأيام الأبراج
سود الليالى داسته في قدمها
لو الرجال إتقاس بالبشت والتاج
ماتفرق شيوخ العرب من خدمها
ناس فرقها وجودها بين الأمواج
وناس تساوى وجودها من عدمها
من جرب الحاجه عذر كل محتاج
ناس عطاها الله وناس حرمها
وقت يهيج ويصطفق مثل الأمواج
تبني الأماني والظنون تهدمها
الياس دمعه والرجا ضحكة حجاج
ونفسك قبل لا تلوم الأيام لمها
ماعاد يمدي والحكي دونه سياج
لكن تهجا كلمتي وافتهمها
إما تجي بإحراج وتروح بإحراج
والا تثمن جيتك وإحتشمها