يرجوك من نجله بدار الاجانيب

1427/10/10

قصيده للشاعر // نشمي زامل الرشيدي


سر ياقلم رتب لي الحرف ترتيب
أبي تساعدني بشيء نويته
جعلك ربي خدمةٍ للمكاتيب
وعلّم بك الإنسان فيما حويته
أنت أول مخلوق لاشك لاريب
جميع خلق الله بأمره حصيته
تكتب بحفظ وتعرب الحرف تعريب
ولي أمرك رب السماء ماعصيته
يالله ياللي فاهماََ بالمطاليب
غيرك مايقدر طلبتي لو رجيته
تلم شمل أحبابنا عقب تغريب
ياواحداَ جميع شيءَ وليته
ياحامل السبعة بليا مقاضيب
ياواحداَ فوق السماوات بيته
يرجوك من نجله بدار الأجانيب
ماله سوى رجواك شيئا هقيته
عديت مرقابٍ يسمونه احديب
نهار ثالث شهر الأضحى رقيته
قنبت في راسه كما يقنب الذيب
وماكان في صدري كلاماَ عطيته
مالي سوى رجواك ياعالم الغيب
وماتفرضه علي غصبن رضيته
ماكان لي شفٍ بغرام الخراعيب
من عقب الستين عمري نسيته
في خاطري فعل الصخى والمواجيب
ودرب الردية تاركه ماوطيته
الطيب صعب ويتعب الرجل تتعيب
ولا الردى سهل وأنا ماهويته
صديت عن طرد العذارى بتجنيب
من يوم شفت الشيب ياليت ليته
ياليت ليت وياليت مايطلع الشيب
عزالله انه يفضحك لو صديته