الله يعين الصابر اللي صبر دوم

قصيدة الشاعر /نشمي زامل الرشيدي


الله يعين الصابر اللي صبر دوم
والناس صبر اليوم مايقدرونه
واللي كتبه الله مقدر و مقسوم
ماحد يصدالقدر لو تكرهونه
لو كان راعي الصبر هالوقت معدوم
مافيه من يصبر ويخفي طعونه
ﻻ صار شيئا فات ماينفع اللوم
واللوم يثر بالنفوس المهونه
ﻻ تقول ذا حاكم وهذاك محكوم
الحكم للي نعمته تشكرونه
واليوم فرخ الحر خايف من البوم
وأبو حقب ماضي على الناس كونه
والذيب من لذات هالوقت محروم
حتى البساس يشاركنه بشونه
كيف الاسد اللي يهابونه القوم
خايف من أصغار الثعالب تخونه
والنمر عقب الفعل مايقدر يقوم
كفه قصر ومشلعات سنونه
والكلب من عقب السهر طاح بالنوم
اللي قبل وراء الغنم يربطونه
وحتى الغراب يطير بالجو ويحوم
من عقب ماهو خايف يطرحونه
شالوا عنه وسم على الخد ماسوم
وصاروا عمامه كلهم يخدمونه
وهو على وقت النبي كان مذموم
ولو بعضهم بالثمن يشترونه
وﻻني بخلق الله مكلف وملزوم
لكان شيئا كلكم تعرفونه
وقت مضى حلو به الراي مفهوم
واليوم كل خايف من ظنونه
الوقت هذا يجعل الفكر مسموم
من يستمع كذب بنظرت عيونه