يعوضك عن بارد الوجه جربوع

الطيب راع الطيب يرفع وقاره
مهو على كل المطاليق ممنوع

الغانمين إلهم مواري وشاره
تفرق بهم فرق الثريا عن القوع

اسند على اللي مايهاب الخساره
اللي بوقت اللازمه فيه منفوع

وإلا الردي ماينفعك بإعتباره
يوّضك عن بارد الوجه جربوع

من رافق الطيّب سلك مع مساره
ومن رافق الخيّب من العز مصروع

وثنتين عوق اللي بكبده مراره
الفقر هو القهر والعمر منزوع

وثنتين دون المحكمه والأماره
عرضك ومالك حفظهن حق مشروع

والنار تكبر والبدايه شراره
ولازالت النخوه لها يوم وافزوع

هذا كلام اللي موثّق قراره
الشك بجذوره من النفس مقطوع

ماعيروا جده بضيفه وجاره
وراس الخوي مرفوع مهو بمخنوع

ميزة تفوّق نادره بالجداره
ماهي بمسبوقه ولا مثلها نوع