مفهوم حسن الخلق!؟

‏بسم من بدا بأمره بحرفين كاف ونون=الاول والآخـر مـامـعـه واحـدً ثاني
له الحمد والمنـه وتسبيح ماب الكون=وله الملك كله يارثه والبشر فاني
عليه اتكالي طول عمري وأنا ممنون=اسـأله على درب أهـل الخير يقداني
بعـد ذكـره الشده وصعب الأمور تهون=وظهر للخبر مبـدأ ونظم الشـعـر زاني
ابا ابحث عن اليمه مع القصد والمضمون=ومفهوم حسن الخلق من فيض وجداني
واسميه شجره مثمره خيرها ميمون=ماوارى التراب جذروهـا خلق رباني
ذكره الولي في محكم كتابه المكنون=ووصف فيه طه المصطفى نسل عدناني
على ساس مبداه الشريعه فخر واحصون=حباه الكريم احماه عن كل نقصاني
مـايوصـف بغيـره فـاز وامتـاز نوع ولون=مواريه باللي فيه تنزيه وإيماني
حليم على الجاهل ولايواخذ المجنون=ويعين الضعيف ويجزي السيء باحساني
حشـم من تحلابـه عن الناقصـه والهون=سمى واعتلا شأنه عن الهزل والداني
ملامح نقاء يوسف ورهبة نداء ذا النون=وجبروت صبر إيوب في كل ماكاني
وهيبـة نبي الله موسى على فرعون=ومكارم شفيع الخلق في زوغ الاذهاني
ياكثر الخصال الحسنه اللي بها مقرون=لكن اضمحل الفكر والوقت عجلاني
يقل الكلام ويسكت الماهر الملسون=ويجف اليراع وملهم الحرف ماعطاني
‎عايض المهيمزي