شعر عن البر ............اتمنى يعجبكم

السلام عليكم ورحمة الله وبركاته

يـاماحلا الـمسرى مع طرة النور ^^ مـن قبل خيط الشمس يبدي شعاعه

مـع رفـقةٍ مافيهم اللي به قصور ^^ ربـعٍ تـربوا عـالكرم والشجاعه

كـل واحـدٍ فيهم مجرّب ومخبور ^^ مـاشاور الـحرمه بـخوة ربـاعه

لا جـا لـزومٍ مـايصفون بالدّور ^^ كـلٍ بـذل مـجهود قدر استطاعه

أمـيرهم يـهتم بـالرّاي والـشور ^^ دايـم يـدوّر ويـن راي الجماعه

لا صرت عنده كنك بعش عصفور ^^ مـاباقي الا يـوكّلك فـي ذراعـه

لاجيت اقول اسمه اسميه منصور ^^ كلٍ يعرفه من طيور البتاعه

شيل الشوازن والفشق معهم صقور ^^ وحـمام لا صاروا طيورك جواعه

مـوترك جيبٍ خلفه العفش مجرور ^^ يـسوقه الـلي خـاف ربه وطاعه

وجمسٍ محمل ما ركب فيه مطيور ^^ هـو مـنوة الـلي مات قلبه وباعه

عـفشك مـكمّل فـيه زلٍ وماطور ^^ وبـيتٍ من (القاضي) جديدٍ شراعه

وعـدة الـمطبخ بـين قـزٍ وتنّور ^^ وحـوايج واغـراض فـيها نفاعه

ورز(الـمهيدب) مع سكاكين وقدور ^^ واحـرص على الطبّاخ كمّل متاعه

ونـجرٍ ومـحماسٍ ودلّـه ودافور ^^ وبـنٍ وتـمرٍ يـغري اللي شباعه

تـنزل بـروضٍ توّه اليوم ممطور ^^ والـغيم عـقب الشمس تم انقشاعه

الـبر حـولك كـله ورود وزهور ^^ وقـت الـربيع العشب زاد ارتفاعه

حـتى الرمل تشتم له ريحة عطور ^^ والـقاع خـضرا كـن فيها زراعه

معك خروفٍ مايبي ضرب صاطور ^^ اذا ذبـحـته عـلّقه مـن كـراعه

احـمس بـصيله والمعاليق عالفور ^^ مـن طعمه الجوعان ياكل صباعه

مـن عقب هذا ما تبي طب دكتور ^^ كـانك مريضٍ صار عندك مناعه

حـنّا بـنعمه بس تبي حمد وشكور ^^ وحفظ الصلاة الخمس ويّا الجماعه

مـا تـغتني لو تملك المال وقصور ^^ لا صـرت مـا تملك كنوز القناعه

السيف العطيب

مشكور على النقل وصح لسان قايلها
وتقبل مرورى وتحياتي

شكرا لمرورك على موضوعي وهذا شرف لي ووسام على صدري

السيف العطيب

اشكرك جزيل الشكر على النقل وفعلآ رحله مفصله صح السان قايلها وسلمت اناملك على النقل المميز لاعدمناك في منتداك عزيزي الفاضل

تقبل مروري وتحيييييييييييييييياتي الحاره لك

مشكوووووور والله يعطيك الف عافيه
على المرور لاعدمناك يابو سلطان
ولك ارق التحيه

صح لسانك..ومشكور على الطرح الرائع.