القصيدة للشاعر عيد بن مربح الرشيدي

القصيدة للشاعر عيد بن مربح الرشيدي




بديت بآسم مكون الأنـس والجـان
بأسمه يعاهـد كـل جـنٍ مـرودي
وردٍ علـى ماقالـه فـلان وفـلان
ضعوف النفوس اللي تغث الكبـودي
تاريـخ متجـرد وتأليـف عميـان
كنه علـى ظلـم العبـاد محـدودي
أخص من سطر بالاحقـاد ديـوان
حقـود والمصـدر كتابـة حقـودي
اليا أنعدم مبدى العقيـده بالانسـان
يقـدر يسـوي مايسـوي اليهـودي
ولأهل الوفا والصدق شكراٍ وعرفان
وتحيـةٍ عـطـره وبـاقـة ورودي
نعم رشيدي من بني عبس غطفـان
من قيس ابن عيلان شجرة جـدودي
تحت مسمى عبس واشجع وذبيـان
تلقى عنا وينـي ومجـدي وجـودي هرجٍ على صدق وحقايق وبرهـان
حقايـقٍ تدمـغ دمـاغ الجحـودي
حقايقٍ تروي معانـي خبـر كـان
بخطـوط كوفيـه بصـم الحيـودي
حصل المنافس والسبب سبة حصان
سبة فرس وحصان راحت فهـودي
وجانا بغا التركـي ودارن الاكـوان
دون الكرامـه والوطـن والعـدودي
ومر الجفاف وراحوا البـدو فرقـان
كل ٍ طوى بيتـه بظهـر القعـودي
وزاحوا لنا من غبر الايام فرسـان
احدٍ حـدر وأحـدٍ توجـه سنـودي
شالوا على فلك البحـر لأم درمـان
يبـون وديـانٍ سقتهـا الرعـودي
ثم استقـروا بيـن كسـلا وحلفـان
يتلـون شـف مطيـرات البـدودي
ونزلٍ نزح للسيف راضي وقنعـان
مـن البحـر للدبـدبـه للنـفـودي
قوم ٍ لهم في ساحـة المجـد ميـدان
يـوم ان كـلٍ دون حـده يـذودي
صالوا وجالـوا واستقـروا بهـدلان
دار الصبـاح اللـي تلـم الوفـودي
ونزلٍ تورث منزلـة عبـس بأبـان
ونزلٍ بوادي السر سوى السـدودي
وفي كل دار ألنا مـوارد وعربـان
وتاريخنا بارض العرب له وجـودي
وحنا بقينـا بالمنـازل والاوطـان
بأقسى الظروف مواصلين الصمودي
ترمز لنـا الكفـه هويـه وعنـوان
الناس تعـرف والعوانـي تـرودي
يوم الجزيره بين تسعيـن شيطـان
نطعن ونطعن دون هاك الحـدودي
من المدينـه حدنـا ضلـع حبـران
مايمرها الا مـن خضـع للقيـودي
ومن حرة الكوره لشرقـي مرغـان
بعد امرنا يردون ماهـا الـورودي
ومن ذاق ضرب سهونا راح ندمـان
يمـوت مافكـر بلـم الـجـرودي
اسلاحنـا قـو العزيمـه والايمـان
والا عددنـا بالحسـاب مـعـدودي
ودخيلنا ممن عن الضيم مـا يهـان
وسلامته نبـذل وراهـا الجهـودي
وخوينا مايكظـم الغيـض زعـلان
وقصيرنـا نعطيـه حـقـه وزودي
حنا هل المعروف ورجال الاحسـان
قومٍ نجود اليا أنعـدم كـل جـودي
وأمجادنا غصبٍ على كل مرضـان
شعاع ذري في عيـون الحسـودي
ويوم ارسل الله مسلما لـم الاخـوان
سرنا ورى صقر الجزيره جنـودي
من ضمن جيش الفيصلي نسل عدنان
والله يشهـد والخلايـق شـهـودي
وننعم بحكم محاسبـة كـل غلطـان
ولا عاش من يجرح كرامة سعودي




وشكرا لكم

ونعم بالشاعر ونعم بالناقل
مشكوور اخوي على القصيده الجميل
لاشك انها قصيده مثل ماء الذهب
تقبلني كما انا

ونعم وصح السان شاعرها
تحيتي

صح السان ابو غريب
ولاهنت اخوي فيصل على النقل
تحياتي لك

صح لسانه ..

قصيده معرووفه ..

تحيااااااتي لكم ..

صح لسان الشاعر الكبير والمعروف
ولاهنت اخي فيصل على طرحها