اكثر الشعوب اجازات في العالم‎

هل تعلم أن اليابانيين أكثر شعوب العالم المتقدم حرماناً من العطلات ،

اذ لا يتعدى متوسط اجازاتهم تسعة أيام في العام

بينما الفرنسيون هما أصحاب النصيب الاكبر من العطلات

بمتوسط يبلغ 34.5 يوم سنوياً.

وتمنح الولايات المتحدة العاملين ثاني أقل عدد من العطلات سنويا

بمتوسط 17 يوماً يأخذ معظم العاملين منها 14 يوماً ،

ويمنح النيوزيلنديون 19.5 يوم سنوياً يستهلكون منها نحو 17

بينما يستخدم الاستراليون 16.5 يوم تقريباً من اجمالي العطلات وعددها 20 يوماً.



مساكين يا اليابانيين

صدق أنكم شعب محروم من الراحه

تهجولون في ذا الدنيا لا راحه ولا نوم ولا فلة حجاج

علشان تقدمون اختراعات تفيد الانسانيه

همن بتموتون واللي ما اسلم منكم بيخلد في النار

وخلوا الانسانيه وسوني ومتسوبيشي وتويوتا تنفعكم



اقول خلوكم مثلنا بس

والله ياالانسانيه ما قامت ولا قعدت عندنا

فالين ام الحياة.. اجازات ونوم وتسدح وتبطح ولله الحمد والمنـّه





شوفونا ايام السنه 365 واجازتنا 355 يوم





الموظفين..شهر أجازه نظاميه و10 ايام اضطراريه

و3 شهور تروح ما بين اجازاة وفاة والديه وعمانه وعماته وخواله وخالاته

وامهاته من الرضاع وابوانه من الرضاعه واصدقاه من الرضاع



الموظف السعودي هو الوحيد في العالم اللي تتوفى له 12 جده و12 جد في السنه..

ومنها شهرين استئذانات من المدير علشان يجدد الرخصه والاستماره

ويضيف ولده في دفتر العائله ويسجل ولده الثاني في المدرسه

ويطلع ولده الثالث من مرورالناصريه ..

و55 يوم يطلع من الدوام يبلغ الشرطه عن شغالته المنحاشته





و3 شهور اجازات مرضيه منها شهر ونص في السنه

اجازات خلع اسنان .. تماسيح مهوب موظفين

وبعدين مدري وش ذا الاسنان اللي يخلعونها وتنبت ..



تصدقون يا جماعه ان بعضهم يكون باقي عليه ويتقاعد سنتين

ويجيب اجازه مرضيه بسبب خلع ضرس عقل

واللي موقع الاجازه طبيب نساء وولاده





والطلاب والطالبات اجازات الصيف 3 شهور

ومعها مكرمه من اهالي الطلاب نص شهر

واجازة حج 20 يوم

معها مكرمه 10 ايام من اهالي الطلاب والطالبات



و10 ايام اجازاة نص سنه

ومعها 15 يوم مكرمه من اهالي الطلاب والطالبات



واجازة ربيع ومعها 15 يوم مكرمه من اهالي الطلاب والطالبات

واجازات امطار واجازات غبار

وغيابات بسبب الانفلونزات

وغيابات للطلاب بسبب هزايم فرقهم..

واللي مسكوه المرور وخلوه يفك انوار الزينون

وعلم ابوه ولعن جدفه ..وتعبت نفسيته



وغيابات للطالبات بسبب نفسياتهم تعبانهم ..



واسباب تعب نفسيات البنات متعدده

اللي قصت شعرها وطلع وع

واللي محد عطاها وجه على البي بي

واللي طلعت لها حبة شباب في خشمها

وقاعده طول الليل تراقب ذا الحبه لين تعبت نفسيتها ..

ميسي مهيب حبة شباب

الزبده أن الطلاب ما يصفى لهم من دراسة ال8 شهور الا 18 يوم



اما المدرسات والموظفات فحدث يا اها بس ولا حرج

اجازات مثل الاجازات الرسميه للطلاب والطالبات

واضيفوا لها اجازات مرضيه اثناء الحمل

واجازات نفاس ممكن توصل ل 3 شهور

عشان كذا ذا المدرسات هم اكثر من يحمل ويولد

بزعمها انها بتكثر امة الاسلام وهي تبي تتبطح وتتسدّح



طبعا اضافه للاجازات المرضيه بانواعها

المدرسه تراجع كل التخصصات الطبيه علشان تجيب منهم اجازه

اسنان وانف واذن وباطنيه وبوليه وجلديه ونساء وولاده

وعظام واصابات ملاعب



وأجازه علشان فيها ضيقه وشاكه ان منظوله

على طاري الضيقه ..

قسم لو للرقاة الشررعيين صلاحيات منح اجازات مرضيه

ان ما تلقون مداوم في مدارس البنات الا البواب والفرّاشه و5 طالبات دافورات



نرجع لمحور حديثنا ..

وغياب بعض ايام الاربعاء لانها بتروح لزواج

ولازم تمسك سرا عند الكوافيره من الضحى



واجازه مرضيه بعض ايام السبت لانها كانت عازمتن حمولتها وتعبت

مع ان حمولتها كانوا عندها يوم الاربعاء ..

الحين الشغاله هي اللي تتعب والمدرسه هي اللي تاخذ اجازه!!!