ابياات خالده لشعراء قدماء

هناك أبيات تميزت بملامستها لأعماق الناس وقربها من همومهم وقضاياهم حيث جاءت بأسلوب مطابق لما يريدون التعبير عنه فظلت عالقة في الأذهان والعقول وحفظها الناس وتناقلوها حتى يومنا هذا لتضرب بها الأمثال في الأحداث والمناسبات المشابهة، ومما قيل في الحكمة والنصح والارشاد هذه الدرر الثمينة من المقتطفات الشعرية:




أحفظ دبشك اللي عن الناس مغنيك=اللي ليا بان الخلل فيك يرفاك
وأعرف ترى مكة ولاها بناخيك=لو تطلبه خمسة ملاليم ما أعطاك
والحر مثلك ما يصحب الديك=وإن صاحبه عاعا معاعات الأدياك
بركات الشريف


ليا عاد ما للرجّال رأيٍ يدله=يأخذ من أشوار الرجال دليل
الشريف جري الجنوبي


من عوّد العين المنام تعوّدت=ومن عوّد العين المساري تعاود
ومن عوّد الصبيان أكل بيته=عاودوه في عسر الليالي الشدايد
راشد الخلاوي


النوم رأس اللوم بان الردى به=واللي يبي الطولات نومه شلافيح
الذيب ما يرقد ورزقه نهابه=يدوّر الغرات عند المصاليح
واللي يبا الطولات يتعب ركابه=والعز بأكوار النضا ياهل الفيح
مريبد العدواني


فتى بلا عزم حياته مذلة=والعزم لقلوب الرجال طبيب
من لا صبر بالعسر ما ذاق يسرها=وباب الفرج للصابرين قريب
محمد الأحمد السديري


مقام الفتى في منصب العز ساعة=ولا ألف عام يصحب الذل صاحبه
راشد الخلاوي


المراجل ما تهيّا هالسّويا=كود من عض النواجذ في سنونه
عبدالله القريفة


الظفر ساعه وإن حلّ ماجوبه=والمراجل لها حزّات ورجالي
ضيدان العارضي


الحمّرة تدرك معوشة عيالها=وألا الرجل يبغى منه بعض الأحوال
خلف أبو زويد الشمري


ليا صار ما توفي عميلك من الصاع=ما ينقعد لك عند حصن النواهيم
شبرٍ من البيداء يعوّضك بالافزاع=وسود الليالي يبعدنّك عن الضيم
سعدون العواجي


من لا يديس الرأي من قبل ما ديس=عليه داسوه العيال القرومي
ومن لا يقلّط شذرة السيف والكيس=يبدي عليه من الليالي ثلومي
والقصر ما يصلح على غير تسييس=ومن لا تعلم ما تفيد العلومي
تركي بن حميد


الناس ما تسقيك لا صرت عطشان=ولا يشرب المضمي كود من ذراعه
أضرب على الكايد ليا صرت بحلان=وعند الولي وصل الحبل وإنقطاعه
عيبٍ على اللي يتقي عقب ما بان=وعيبٍ طمان النفس عقب إرتفاعه
عبيد العلي الرشيد


من حل دار الناس حلّوا دياره=لابد ما تسكن دياره ويغبن
ومن شق ستار الناس شقوّا ستاره=ومن ضحك بالثرمان ضحك بلا سن
شالح بن هدلان


حيٍ يورّيك المذلة وتغليه=أنا أشهد إنك ميت القلب عامي
من لا يوّدك لا توّده وترجيه=أرفع مقامك يا عزيز المقامي
محمد الأحمد السديري


الضرس يعبى له عن السهر مقلاع=حتى تنام العين ما هي طلابه
خلف الأذن


أنا أشهد إن بقصرة الرجل نوماس=لا صار ما للرجل داعيٍ دعاها
مبارك بن عبيكة


لا تأخذ الدنيا خراصٍ وهقوات=يقطعك من نقل الصميل البرادي
لك شوفةٍ وحده وللناس شوفات=ولا واديٍ سيله يفيض بوادي
عبدالله بن سبيّل


لا يأمن المظهود جمع المعزة=ولا يأمن الجمع العزيز الظهايد
أيضا وبيت الفقر لا يأمن الغنى=وبيت الغنى لا يأمن الفقر عايد
راشد الخلاوي


ليا خاب ظنك بالرفيق الوالي=ما لك مشاريهٍ على نايد الناس
محمد الأحمد السديري


يا بايعٍ جوخٍ على غير أهاليه=مثل الذي ينزل بقصرٍ خرابه
ولد الردي لو طاب لك لا تماشيه=يومين والثالث يبين الردى به
مشعان بن هذال


لعل قصرٍ ما يجي له ظلالي=ينهد من عالي مبانيه للساس
لا صار ما هو مدهلٍ للرجالي=وملجأ لمن هو يشكي الضيم والباس
محمد الأحمد السديري


الأجواد إن قاربتهم ما تملّهم=والأنذال إن قاربتها عفت ما بها
الأجواد وإن قالوا حديثٍ وفوبه=والأنذال منطوق الحكايا كذابها
الأجواد صندوقين مسك وعنبر=ليا فتحت أبوابها جاك ما بها
والأنذال لو غسّلوا ايديهم تنجّست=نجاسة قلوبٍ ما يفيد الدواء بها
محمد المهادي


أحدٍ على جاره بختري ونوّار=وأحدٍ على جاره صفاةٍ محيفه
خطو الولد مثل البليهي ليا ثار=زودٍ على حمله نقل حمل أليفه
وخطو الولد يا مال قصّاف الأعمار=لا نافعٍ نفسه ولا منه خيفه
مقحم النجدي الصقري


شبعنا وشبع الذّر من زاد سورنا=وللذّر في زاد الكرام معاش
يعطي العطى من كان ضاريٍ للعطى=ويمنّ العطى من كان خاله لاش
ومن لا يعرّب منسبه قبل منشبه=تروح عليه عيلانه بلاش

...........


عرّب وليدك عرّبه=والنار من مقباسها
والعز بوروك النساء=اللي عريبٍ ساسها
بنت الردي لا تأخذه=لو هو طويلٍ رأسها
............


لا تأخذ الهزلا على شأن مالها=ولا تقتبس من نارهم بالوقايد
لا تأخذ ألا بنت قومٍ حميده=لعل ولدٍ منها يجي بالفوايد
راشد الخلاوي


أبا أنذر اللي من ربوعي يبا الطيب=لا يأخذ ألا من بيوت الشجاعه
يجي ولدها مذربٍ كنّه الذيب=عزٍ لأبوه وكل ما قال طاعه
وبنت الردي يأتي ولدها كما الهيب=غبنٍ لأبوه وفاشله بالجماعه
يا كبر زوله عند بيت المعازيب=متحريٍ متى يقدم متاعه
شالح بن هدلان


الطيب ما هو بس للضاعنينا=قسّم على كل الوجيه المفاليح
بداح العنقري


ما مال ألا فارغٍ من زبرها=ولا حي ألا مقتفيه المماتي
سعدون العواجي


لولا الهرم والفقر والثالث الموت=يا الآدمي بالكون يا عظم شأنك
لولا الثلاث وشأن من قدّر الفوت=نفذّت كل اللي يقوله لسانك
محمد الأحمد السديري


أيامنا والليالي كم نعاتبها=شبنا وشابت وعفنا بعض الأحوالي
بديوي الوقداني


نعد الليالي والليالي تعدنا=العمر يفنى والليالي بزايد
راشد الخلاوي


شابت لحانا ما لحقنا هوانا=وعزي لمن شابت لحاهم على ماش
/ فهيد بن عبدالله الخرينق الرشيدي


وأخير منها ركعتين بالأسحار=لا طاب نوم اللي حياته خساره
تركي بن حميد


يا دحيم ريضان الجماعة مريفه=واللي مع الأجناب كنّه على نار
الطير بالجنحان ما أحلا رفيفه=وليا إنكسر حدا الجناحين ما طار
ويمنى بلا يسرى تراها ضعيفه=ورجلٍ بلا ربعٍ على الغبن صبّار
عبدالله بن سجوان الرويس


والله يا لولا العظم يومني أملاه=أكويه بالجمرة ويكوي جروحي
مع دلةٍ صفرا على النار مركاه=أقصر بصبتها على كيف روحي
فنجالها يشدي خضاب الخونداه=الجادل اللي عند أهلها طموحي
عدّه لمن يثني خلاف المخلاه=فكاك بالضيقات راع اللحوحي
وعدّه لقرمٍ ما توني مطاياه=يضوي ولو صكت عليه النبوحي
وعدّه لمن تدفق السمن يمناه=عيدٍ لربعه بالزمان الشحوحي
وباقي الرجال فحول نسوان ورعاه=ضباط مال وحافظين السروحي
ذعار بن مشاري بن ربيعان


لا شفت خطو الظول بالك تعسّه=وإن فارقك شر المخاليق خلّه
لو عندنا من غيب الأيام رسّه=الآدمي مصلوح نفسه يدلّه
محمد بن مهلهل بن شعلان


من صد عني له الطاروق خليته=عيبٍ على البنات الناس يبلاها
محمد بن حجي المطيري


من عافنا عفناه ولو كان غالي=ومن باعنا بالرخص بعناه بزهود
مزنة بنت مكازي


برقٍ مصدٍ لو مزونه لها نور=لا تستخيله لو ربيعك شفاقه
من لا استشارك لا تعدّي له الشور=ومن لا يوّدك نور عينك فراقه
الدقيس الجمّيليّه


الزول زوله والحلايا حلاياه=والفعل ماهوب فعل واف الخصايل
زوجة وديد بن عروج

شابت لحانا ما لحقنا هوانا=وعزي لمن شابت لحاهم على ماش
هذه القصيده نسبت لكثر من شاعر
ومنهم السرحاني والشاعرالكويتي الخرينج الرشيدي والسهلي وغيرهم من الشعراء والقصيده لن يعرف من قايلها وكثرة الرواة عنها

اختي الفاضله بارك فيك على مجهودك
لك ارق تحيه

مديري الفاضل تعطرت متصفحتي بتواجدك

ولكن الاكثر نسب لهذه القصيده هوو / فهيد بن عبدالله الخرينق الرشيدي

انا اسمع باليبت هذا

شابت لحانا مالحقنا هوانا =وعزي لمن شابت الحاهم على ماش

ياماعطانا الله وياما عطانا = والله مجملنا لو مالناادباش

وياما على ذود قوم سرانا = في ليلة مابين عجن ورشراش

نمشي ونحسب يالوضيحي اخطانا = عشرين ليله بين مسراء ومغباش


كنت هنا

بدوي فااااهم

اقتباس:
المشاركة الأصلية كتبت بواسطة بـــدوي فااااهم
انا اسمع باليبت هذا

شابت لحانا مالحقنا هوانا =وعزي لمن شابت الحاهم على ماش

ياماعطانا الله وياما عطانا = والله مجملنا لو مالناادباش

وياما على ذود قوم سرانا = في ليلة مابين عجن ورشراش

نمشي ونحسب يالوضيحي اخطانا = عشرين ليله بين مسراء ومغباش


كنت هنا

بدوي فااااهم



حياك اخوي بدوي

اذا نظرنا لهذه القصيده نجد التلفيق الواضع لها

الان كل بيت يختلف عن نمط البيت الاخر

والاهم والكلام على البيت الاول فقط

لو رجعنا للبيت الاول

وجدنا هذا البيت الذي يتفق معه

ياماعطانا الله وياما عطانا = والله مجملنا لو مالناادباش
ممكن هذا البيت والبيت الاول شاعرهم واحد
بارك الله في الجميع

بنت ابوي
تسلمين على هذا الانتقاء الراااائع

شكر لكم
اسعدني تواجدكم
لا حرمناا منكم وتعليقاتكم