زي كل يوم خرح يصيح من بلكونه

بسم الله الرحمن الرحيم

السلام عليكم ورحمة الله وبركاته
.................................................
يا جماعه انا قرات قصه جميله جدا
حبيت اشارككم بيها
اذا لقيت تفاعل باذن الله هنزل كل يوم حلقتين تلاته كدة
ونبتدى باذن الله مع اول حلقه

.................................................. ............

الحلقه الاولي
...................



زي كل يوم خرج يصبح عليها من بلكونه اوضته اللي قصاد شباك اوضتها

رنا : صباح الخير يا حبيبي

رامي: صباح الفل علي عيون اجمل رنا في الوجود..وحشتيني اوي

رنا: و انت وحشتني اوي اوي

رامي: يلا ربع ساعه و الاقيكي واقفه تحت في مكانا عشان اوصلك علي جامعتك

رنا: لا يا حبيبي مينفعش النهارده .. احمد هيوصلني معاه

احمد اخو رنا الوحيد مهندس في شركه مقاولات كبيره في اسكندريه

رامي: نعم احمد .. و ايه اللي هينزله بدري كده ؟

رنا: هيعدي يجيب معاش بابا و يوصلني في طريقه و بعد كده يطلع علي الشغل

رامي: يعني ايه مش هعرف اقابلك النهارده؟

رنا: معلش بقي ماانت معايا اهه

رامي: لا انا هجيلك بعد ما تخلصي محاضراتك و هطلع عين البيه اخوكي ده و اسيبله كل شغلي و اخلع

رنا: هههههههه احسن برده يستاهل و انا هستناك انا هخلص الساعه 2

رامي: 2 الا ربع هتلاقيني وافق علي باب كليتك

رامي برده مهندس و صاحب احمد الانتيم و بيشتغل معاه في نفس الشركه و نفس المكتب

رنا في اخر سنه كليه الصيدله


في الشغل

رامي باستعباط : ايه ده تتحسد و الله جاي بدري النهارده ... معدتش عليا ليه؟؟

احمد: اصلي وصلت رنا الجامعه و بعدين رحت اجيب معاش بابا.. النهارده 10 في الشهر و ماما مبقتش تقدر تروح تجيبه .. و بعدين يا اخويا زعلان اوي عشان معدتش عليك ال يعني اسم الله بلاقيك كل يوم مستنيني

رامي: و انا اعملك ايه انت اللي بتصحي متاخر و انا بحب اجي بدري

احمد: ماشي يا عم الملتزم

رامي: انا همشي بدري النهارده و عايزك تطلع جدع معايا كده و تكمل الشغل بتاعي عشان اعرف ازوغ

احمد: تزوغ ده انا لسه بقول عليك ملتزم

رامي: مره يااخي من نفسي ماانت كل يوم تسيبلي شغلك كله و تمشي

احمد: ماشي يا سيدي بس قولي هتزوغ علي فين؟

رامي: ها... مشوار كده لازم اعمله قبل الساعه 2

احمد: اممممممم طيب

احمد كان حاسس ان في حاجه بين رنا و رامي لكن مكنش يعرف ان في بينهم مقابلات و كلام كمان لانه بيثق اوي في اخته و في صديق عمره كان بيسكت علي بعض النظرات اللي بيشوفها دايما في عنيهم لما يشوفوا بعض في اي مكان يجمعهم هما التلاته بالصدفه



في الجامعه رنا جايه من بعيد معاها اتنين من صحابها لمحت رامي استاذنت من صحابها و قربت منه

رامي: وحشتيني يا حياتي

رنا: و انت كمان وحشتني اوي

رامي: يلا بينا

رنا: علي فين؟

رامي: نروح نتغدي في اي مكان انا واقع من الجوع

رنا: لا يا رامي احسن حد يشوفنا تبقي مشكله

رامي: مين بس اللي هيشوفنا الشغل اللي سبته لاحمد مع شغله قدامه للساعه 5 لما يخلص منه

رنا: يعني محدش عارفني غير احمد؟

رامي: متحبيكهاش بقي لو حد شافنا هخدك و نروح علي الست والدتك و اقولها يا ست الكل انا عاوز اتجوز بنتك و حياتك عندي اتجوزك في اسبوع واحد

رنا: بحبك

رامي: يعني موافقه طب يلا بينا



شدها من ايدها و خدها في عربيته علي مطعم علي البحر


رنا: انت بتوحشني اوي يا رامي مع انك قدامي كل يوم و ممكن اشوفك في اي وقت بس دايما واحشني نفسي تبقي معايا علي طول

رامي: ماانتي اللي منشفه دماغك كان زمانا متجوزين من سنتين

رنا: يا حبيبي مش عايزه اتجوز و انا بدرس عشان منشغلش عنك يا روح قلبي بالمذاكره ووجع القلب اللي انا فيه ده

رامي: بعد الشر علي قلبي من الوجع .. بس تعالي هنا قوليلي معني كلامك ده انك اخيرا اقتنعتي انك متشغليش بعد الجواز مش كده؟

رنا: مين قال كده هشتغل طبعا بس تفرق الشغل هيبقي الصبح و هترجع من شغل تلاقيني موجوده في البيت مستنياك لكن لو لسه بدرس هتلاقيني ماسكه الكتاب ليل و نهار ده غير المحاضرات كل يوم و السكاشن اللي ممكن تقعد ل 5 /6 و و و

رامي: بس بس عقدتيني خلاص هانت كلها شهرين و نخلص بس الجواز هيتم في خلال شهر واحد اها مفيش لا خطوبه و لا غيره

رنا: لا خطوبه ايه احنا بقالنا اكتر من عشر سنين في حكم المخطوبين علي الاقل بينا و بين نفسنا

رامي: ياااااااه فات علي حبنا عشر سنين انا مش مصدق نفسي عدوا كانهم عشر ساعات

رنا: العمر بيعدي بسرعه البرق و الايام الحلوه بتعدي هوي

رامي: لالالا متقوليش كده ايامنا كلها هتبقي سعاده و حب في حب باذن الله

رنا: يارب يا حبيبي انا مش عايزه من الدنيا دي غير انك تفضل معايا

رامي: و انا عمري ما هسيبك ابدا ابدا علي قلبك دنيا و اخره مش هفارقك و لا لحظه يا حياتي

رنا: ربنا مايحرمني منك ابدا

رامي: و لا يحرمني منك يا قلبي





في بيت رامي دخل علي والدته الست ماجدهبتعشق رامي و بتخاف عليه من الهوا الطاير امنيه حياتها تعيش و تشوفه عريس و تشيل ولاده زي ما شالت ولاد ندي اخته بس مش لاي عروسه لهند بنت اختها


رامي: ازيك يا مجود يا حبيبتي

والدته : انا الحمد لله يا حبيبي انت اخبارك ايه؟

رامي: انا تمام يا ست الكل

والدته: احضرلك الغدي؟

رامي: لالالالا انا شبعان اوي و مبسوط اوي اوي

والدته: ربنا يبسطك كمان و كمان ... بس قولي مش عاوز تاكل ليه؟

رامي: يا ست الكل بقولك شبعان اصلي اتغديت بره

والدته: اااه طيب يا حبيبي روح غير هدومك عشان عيزاك في موضوع مهم

رامي: موضوع ايه؟

والدته: بس روح غير هدومك و اغسل وشك و تعالي

رامي: حاضر يا ست الكل

* يارب استر و ميكنش الموضوع اللي في دماغي مش طالبه نكد معايا دلوقتي خالص


غير هدومه و رجعلها

رامي: ها يا ست الكل ايه بقي الموضوع اللي عايزه تكلميني فيه؟

*يا ساتر استر يارب

والدته: خالتك و بنت خالتك جايين عندنا النهارده

رامي:

* يادي النهار الكحلي

والدته: مبتردش ليه يا واد؟

رامي:هرد اقول ايه يعني يا ماما ينوروا

والدته: كنت فكراك هتفرح عشان هند جايه قلت هتقوم تبوسني

رامي: من عنيا يا ست الكل ابوسك اها افرح لا و ادي البوسه

قام باسها من خدها

والدته: انت عمرك ما هتتغير ابدا؟

رامي: و اتغير ليه بس ماانا حلو و زي القمر اهه و لا انتي عندك شك

والدته: اتكلم جد شويه مش معقوله كده ياابني كل ماافتح معاك الموضوع ده تقلبه هزار كده

رامي: عشان يا ست الكل مش هنفذ اللي انتي بتفكري فيه انتي عارفه كويس اني مبحبش هند و اني بحب رنا و مش هتجوز غيرها

والدته: يادي رنا هي سحرالك دي و لا عملالك عمل؟

رامي: اها يالهوي يا ماما سحرالي بس ده انا لما بشوفها بحس اني طاير فوق فوق بعيد في الجنه انا بحبها اوي يا ماما ارجوكي تقدري الحب ده و توافقي عليها و الله هتحبيها اوي

والدته: ياابني و هند مالها بس؟

رامي: يا ماما هند كويسه و كل حاجه بس انا بحب رنا مش شايف و لا هشوف حد غيرها و كلها شهرين و اخدك من ايدك يا ست الكل و نروح نتقدملها

والدته: مش هيحصل طول ماانا عايشه مش هيحصل

رامي: هيحصل يا قمرايه يا عسل انت ماجده بتحب رامي و مبترفضلوش طلب و اكيد تحب تشوفه فرحان و سعيد و مستقر في حياته يبقي هيحصل و لالا؟

والدته بعصبيه: اها يانا منك



دخل اوضه الصالون بعد ما سابته والدته و هي زعلانه و مسك التليفون و اتصل علي ندي

ندي: لسه فاكر تسال علي اختك

رامي: معلش يا دودي و الله مشغل لشوشتي برجع من الشغل همدان مبحسش بنفسي

ندي: ربنا معاك يا حبيبي اخبار ماما ايه و البت رنا عامله ايه وحشاني الندله؟

رامي: رنا كويسه الحمد لله بتسالني عليكي دايما و الله اما ماما بقي

ندي: ايه مالها ماما اوعي تكون تعبانه

رامي: لا كويسه الحمد لله بس خالتك و بنتها جايين النهارده

ندي: اها فهمت

رامي: ما تحاولي تليني دماغها يا ندي انا تعبت اوي و الله بحاول اتماسك اعصابي و اشوش علي الموضوع يمكن تنسي و مبتنساش ابدا ملناش سيره غيره

ندي: ماانت عارف ماما اللي في دماغها في دماغها بس ان شاء الله هتلين انت عارف قد ايه بتحبك و متقدرش تزعلك

رامي: ياااارب

ندي: ان شاء الله ... اقولك تعالالي النهارده الولاد عايزين يشوفك

رامي: و الله فكره هقولها اني وعدت خالد و عمر اني افسحهم النهارده و اخدهم افسحهم شويه

ندي: ماشي يا حبيبي و انا مستنياك


اقنع والدته بالحجه اللي اخترعها و هرب من المقابله بينه و بين هند و كل مره كان بيخترع بيها حجه عشان ميشفهاش و يهرب دايما من كلام والدته بمنتهي اللباقه و الحكمه


لحد لما عدي الشهرين


خلصت الامتحانات و اخيرا هيتقدم لحبيبته و هيتحقق حلم عمره بس قبل ما يحصل ده لازم والدته توافق عشان تروح معاه

هتوافق و لالا و ياتري هيقدر يقنعها و يحقق اللي في دماغه ده اللي هنعرفه الحلقه الجايه اللي هتكون بدايه لكل الاحداث اللي جايه

مستنى رايكم
واذا القصه معجبتكوش
قولوا وانا مش هكملها

تحياتي لكم ابن غازي