تغاريد تغريدلكل ماهو جديد

فكر بعقلك لاتغمض جفونك
وأخذ النصيحه جعل ربي يخليك

لاشفت ناسً باللقى يمدحونك
أعرف ترى هرج القفا مايسليك

من يمدحك قدام عينك يخونك
ومن يمدحك بقفاك بالقلب شاريك

أحرص على اللي ضاق صدره بدونك
وأترك صديقً بالسعه دوم باغيك

بعض الصداقه للمصــــــــالح يبونك
وأليا خذا المطلوب ماعاد يبغيك

عليك في ربع السعد ينفعونك
لو واحدً منهم عن الناس يغنيك

لاصحت ضايق! رددو لك ياعونك
ولاغبت عنهم أرسلوا من يناديك

يرتاح لاشاف الفرح في عيونك
ويضيق لاشاف الحزن في حكاويك

أحدً على سر الصداقه يصونك
وأحدً على سر الصداقه حكى فيك

ربع الرخا لاضقت صعبه يجونك
وربع الشدايد واحدً بس يكفيك