مجرد فكرة

** أحيانا ما يقدر الانسان يكتب أكثر من ورقة صغيرة**

ورقة رقم (1)
ما تذكرين .. ذاك الطفل ..
إللي نخاف منه يقول ..لاهلك ..
عن اللي بينا ..
كان يحصل ..
ما تذكرين ..
ذاك الطفل ..
اليوم شفته .. واندهشت ..
الطفل طال ..
وأصبح رجــــل ..
وحنا بقينا ننتظر ..
وكل يقـــول :
بكره يكون إللي نبي ..
والمسأله صارت مثل ..
بيت على (كومة)رمـــل ..
والطفل ذاك ..
طال وكبر ..
اصبح رجـــل ..

ورقة (2)
رشي حروفك .. هدهدي ..
دنيا الليالي المتعبة..
قولي : تعال ..
أبعد بعيد ..
قولي : المواسم بعدها ..
أقبل تكوني صادقة ..
أقبل تكوني كاذبة ..
خليني اسمع همستك ..
واللي تبينه في الهوى ..
غصب أقوله واكتبه ..
******
رشي حروفك هدهدي ..
دنيا الليالي والسهر ..
خليني أحيا في الخيال ..
واطلع معاك ..
يم القمر ..
لحظه مع الهمس الندى ..
عندي ولا اكذب عليك ..
لابد تكون ..
أغلى الثواني .. في العمر ..

ورقة (3)
وش عاد يضرك اذا قلتي :
صباح الخير ..
وش لونك ..؟
بها دربي يصير أخضر ..
وأحس اني ..
ملكت الدنيا .. والالماس .. والجوهر ..
وبنيت بيتي .. من الفيروز .. والمرمر ..
صباح الخير ..
وشلونك ..
وان كانت ..
مهيب من داخل الاعماق ..
ولا فيها .. حرارة الحب ..
والاشواق ..
أبيها .. بس قوليها ..
صباح الخير ..
وشلونك ..؟

ورقة (4)
جانا الشــتا ...
جانا بهمومه .. وانتهى ..
وقت النسايم والامل ..
ماعاد أشوف ..
الا الغيوم ..
تملا سمانا .. وبرقها ..
يعمي العيون ..
يالله .. ياربي .. ياكريم ..
خل المطر ..
ينزل على أرض وأشوف ..
وقت الربيع ..
وعد على درب القمر ..

ورقة (5)
وجاني الصوت في الهاتف ..
ندى الحرف والهمسه ..
وبعثرني ..
وخلاني على الميعاد اتلهف ..
فلا قلبي ..
يحس بحالتي ويصير ..
ولا حتى يعرف بيومه من أمسه ..
يا صوت الحب ..
وش جابك ..؟
أنا من قبل ميعادك ..
نديم الليل ..
والظلما تغطيني ..
وجيت لمي ..
على الواقع تصحيني ..
وكأنك قلت لاحساسي :-
حياة القلب في لحظه ..
يعيش فيها ..
مع الاحباب والاصحاب ..
والدنيا ..
اذا كانت بليا حب ..
وش هي له ..؟

ورقة (6)
تمشي على مهلك ..
تبينا ننجبر ..
الله معك ..
والخطوه في درب الهوى ..
مية متر ..
الا معك ..
القى الخطى..
ليل وسفر ..
ودورة فلك..

ورقة (7)
كل المشاوير الطويلة تنتهي ..
بجرة قلم ..
كل السفر بين المواني ..
والضياع ..
كل الالم ..
كل الدروب اللي مشيناها ..
بشــقا ..
وحنا بأمل ..
انه يجي يوم اللقا ..
كل الدروب ..
وكل المشاوير الطويله ..
تنتهي بجرة قلم ..
بخطوة هوى ..
نمشيها في درب الهوى ..
تخلي السنين ..
تصبح ثواني .. وينتهي ..
عهد الحنين ..
كل السنين ..
كل السنين ..
حتى القمر ..
نقدر نروح يمه ..
ولا نشوف الخطر ..
وكل المشاوير الطويلة ..
تنتهي .. بخطوة هوى ..
بجرة قلم ..

ورقة (8)
بدايه مالها داعي ..
لان الارض رمليه ..
يجيها الغيم بامطاره ..
وحكاية (السيل ) وهميه ..
ورمال مالها آخر..
عليها (السكه) منسيه ..
وظلام اليأس خلانا ..
نسير في شارع الاوهام ..
لاحنا بعلم من هذا .. ولا ندري ..
نهايتنا تكون لـ (وين)..؟

ورقة (9)
الندى بالحب يقدر ..
فوق (شفايف) كل ورده..
يستريح حتى الصباح ..
ما يهمه ..
غضبة الدنيا عليه ..
أو جنون الكون ..
أو عصف الريح ..
الندى بالحب يقدر ..
وحنا كلش في يدينا ..
بس طول الصمت خلى ..
عمرنا كله جراح ..

ورقة (10)
جيتي مثل نسمة هوا..
عقب العصر ..
والوقت كان .. موسم مطر ..
وهدهدتي دنياي التعب ..
بأحلى الكلام ..
وبأحلى ابتسامه في العمر ..
وين كنتي من قبل اللقا ..؟
وين كنت أنا ..؟
وين القمر ..؟
وين كانت الدنيا بعد ..؟
مدري وعساي ..
مدري أبد ..!!

مجرد فكرة