فخامة ذوق لا أكثر #

خلها بالقلب وانسى لاتفكر
دام شيٍ راح لاتحسب حسابه

لو هقيت بيوم أن بالك تعكر
هي كذا الدنيا ماهي دايم طلابه

بس لاتنسى بعد هذي تذكر
مايطيق الجرح من ذاق الإصابه

مثل صدمات الرفيق إليا تنكر
خابت الهقوى وخاب باللي هقى به

البخيل اللي قفل بابه وسّكر
ما أظن أن الكريم يطق بابه

ومن جهل فرق المؤنث والمذكر
لاتحرى منه مضمون الإجابه

ومن يسوابه جميل ولاتشّكر
مايعرف المرجله حضرة جنابه

وأنت ياللي جامعٍ بالملح سكر
ضعت مابين التناقض والتشابه

لانظرتك قلت نور الصبح بَكّر
كيف جاء مدري لكن الله جابه

المهم أبيك تنسى لا تفكر
دام شيٍ راح لاتحسب حسابه ..