قصيدة صعبة منو يقدر يحفظها؟؟

بسم الله الرحمن الرحيم

احب اقدم لكم اليوم قصيده صعبه شوي من ناحية القراءه وارجوا ان تحوز القصيده على رضى الجميع


صالي صلا صدري صفق صافي الجوف *** لو صاب صم الصخر عصب صلاها

زلزل زبار الزرع زلزال مزهوف *** هزهز زهور الزاد وازهد زهاها

حنحن تحنحن كن وانعن بصنوف *** وانه تحن يجن سامع صداها

لجلج ولج بلالج لجلاج برجوف *** عجعج لهيب هاج واهج سناها

سبت سهيف الساج مسلوب ملهوف *** سلهم بسود سل نفسي سباها

غرو غرير يغر معمرم وغضروف *** اغنج غنوج صغير غالي غلاها

شعشع شعاع الشمس لا من بدا الشوف *** شبيه خشف الريم شادي حلاها

تلتل وتل القلب تلات بتلوف *** عشرين تله فوق تله تلاها

هلهتل جديل هل هايل على كتوف *** اشقر هبل نفسي وهيض هواها

اسمه بحرف الهاء وبعدها ثلاث حروف *** الف وسين وباء تالي نداها

انخى خبير خاض مدخال مخلوف *** صقر عريب الخال ويقدر خفاها

فرم قدير اقدر قوي ومعروف *** قادر قرا قافي ويقدر دواها


اتمنى ان تحوز على اعجابكم

دنوووو ،، الصراحه مرره صعبه/،
وتضحك شوي هههههه هههههاي/،

بس من جد يحتاج لها وقت لتفكيك رموز كلماتها/،

يعني شوفي اقدر احفضها لكن لما اكون فاهمه معانيها يعني بهالطريقه بيسهل علي الحفظ،،

شوفي اول شي امسك بيت بيت واشرحه وافههمه بكذا بيكون حفضها سهل ،،
طيب بنشرح القصيدهـ،باللي نعرف او نقدر عليهـ،،

صالي صلا صدري صفق صافي الجوف **** لو صاب صم الصخر عصب صلاها


الصالي تعبير عن شئ من النار اللي ماتوصل لحد الإحراق..

صلا صدري يعني الهب صدري..

صفق صافي الجوف هنا تعبير عن قوة الحدث و قوة أثر وقوعه بلفظ

صفق يعني ضرب و وصل بشكل مباشر و سريع..

صافي الجوف اشاره لعدم وجود تجربه سابقه و ان الأعماق ماتعودت مثل

هالمواجهات و مااستعدت لمثل هالامر فتفاجأت على ماكانت عليه من بساطه

و صفاء..


لو صاب صم الصخر غصبٍ صلاها..

تعبير عن قوة تأثير هالأمر للدرجه اللي لو يتعرض له الصخر يتعذب منه..


زلزل زبـار الــزرع زلــزال مــزهـــوف **** هــزهـز زهــور اـلـزاد وازهـد زهـاها

زلزل هز بعنف..

و زبار الزرع هو أجمل الزرع و أكثره كثافه و أزهاه و المعني هنا القلب..

زلزال مزهوف يمكن يقصد التعبير عن ان الهز العنيف للقلب كان بشكل عجيب

و غريب..


هزهز هي الهز المستمر و المتكرر للقلب..

زهور الزاد إحتمال تكون ملامح الإرتياح بالإنسان و آثار النعمه يعني الصحه و العافيه..

أزهد زهاها تعني قلَّل من جماليتها أو أفقدها جماليتها بتأثيره وتأثير المعاناة اللي تسبب

فيها..


حنحن تحـنـحـن كــن وانــعــن بصــنوف **** وانه تحـن يـجـن سـامــع صــداهــا

حنحن تحنحن يعني يصدر ونَّات حنين و تأوهات ألم بإستمرار..

كن يعني كتم بعض الشئ..

و انعن بصنوف ... انعن يمكن تكون بمعنى تاه أو تحيَّر و صنوف معناها اشكال و انواع

ونه تحن يجن سامع صداها يعني أنين القلب و حنينه اللي يسمع صداه ينجن..



لـــجلــج ولــج بـلالـج لـجلاج بــرجــوف **** عــجـعــج لـهـيـب هـاج واهـج سـنـاهـا

لجلج بمعنى ماكان له من تحركات وصلت من قوتها لحد انه يصدر منها اصوات قويه..

ولج وصل الى داخل الاعماق ..

بلالج لجلاج برجوف يعني كان دخوله للقلب بالقوه لدرجة الإرتجاف..


عجعج يعني أثار و نشر ..

لهيب هاج يعني نار مفقوده السيطره عليها..

واهج سناها اشاره لواهج النار و تعبير عن شدته..



سبــت ســهيف الســـاج مسلـوب ملـهوف **** ســلـهـم بـسـود ســــل نـفـسـي سـبـاهـا

سبت سهيف الساج مسلوب ملهوف..

يعني أخذت القلب المسلوب الملهوف..


سلهم من السلهمه.. و السود العيون.. و سل نفسي أتعب النفس.. و سباها امتلكها..


غرو غريــر يــغر مغرم وغــضروف **** اغنج غنوج صـغـيـر غـالــي غــلاهــا

غرو تعبير عن صغر السن .. و غرير جاهل لبعض الامور .. يغر يعني يشغل و يخدع..

مغرم يعني اللي يتعلق فيه .. و غضروف احتمال تكون تعبير عن الشخص الشديد..


اغنج تعني اكثر دلع .. و غنوج دلوع.. صغير غالي غلاها يعني رغم صغر سنه الا ان

مكانته كبيره بالقلب..



شعشع شعاع الشـمـس لا من بدا الشوف **** شبيه خـشـف الـريــم شــادي حــلاهــا

شعشع شعاع الشمس يعني نوَّر مثل الشمس .. لا من بدأ الشوف يعني لا ظهر للعين..

شبيه خشف الريم شادي حلاها يعني يشبه صغير الغزلان بما فيه من حلا..


تـلـتـل وتــل القــلـب تـلات بــتــلوف **** عــشـريـن تـلـه فــــوق تـــلـــه تـلاهـــا

تلتل تعني التكرار المتزايد .. و تل القلب يعني سحب القلب بقوه .. تلات بتلوف يعني

هالسحب المتكرر و القوي بيتلف و يعطل القلب..


عشرين تله فوق تله تلاها يعني تابع عشرين محاوله و الحقها بوحده بعد..


هلهل جديل هـل هايل علـى كتـوف **** اشقر هــبل نـفـسـي وهــيـض هــواهــا

هلهل جديل يعني نزل شعره لاكثر من مره على الكتف..

اشقر اللون .. هبل نفسي و هيض هواها يعني فاجأ بالجمال للدرجه اللي صحَّت الهوى بالنفس..


اسمه بحرف الهاء وبعدها ثلاث حروف **** الــف وســــيــن وبــاء تــالــي نــداهــا

رمزية حروف للاسم..



انــخـى خبـيـر خــاض مدخــال مخلــوف **** صــقــر عـريـب الـخــال ويـقدر خفاها

انخى بمعنى استفزع .. خبير خاض مدخال مخلوف يعني فاهم من التجربه اللي سبق

و كانت له و كانت دخوله فيها مخلوف التعب ..

صقر عريب الخال و يقدر خفاها يعني فاهم و عزِّه من عز خاله و يقدر يكشف و يحل هالامر..



فــــرم قــديـر اقــــدر قـوي ومعـروف **** قــــادر قـــرا قــافــي ويــقـــدر دواهــا

قرم يعني الرجل صاحب القلب الحي السنع الحرك حسن التصرف ..

قدير من القدره..

قوي يعني له سلطه و نفوذ..

معروف تعبير عن الشهره بما سبق من المواصفات..

قادر قرأ قافي يعني قرأ قصيدتي و فهم المقصود فيها..

و يقدر دواها يعني يقدر يساعدني و يحل لي موضوعي..


هذا الكلام كله طبعاً حسب مفهوم شخصي قابل للصواب وللخطأ..

و هذا اللي قدرت عليه و ساعدتني فيه معرفتي و فهمي و أعتذر عن أي خطأ وارد..

مع العلم ان هالنوع من القصايد تكسر الكثير من القواعد الشعريه لبناء الصور الغريبه

و اللي يضطر الشاعر فيها لإستخدام ألفاظ غير شائعه و صعبه لعرض قدراته كنوع من التحدي للتركيب../،،


لكن اقولك وبكل صراحه انا اقدر احفضه واذابتسمعين لي سمعيلي هههههاي/،



يسلموووو دانه جد امتعتينا بهالقصيده وضحكتيني

ربي يسعدك ياررروحي ودام جديدك المميزززز/،

واسفه على الاطااالهـ،،،،ـ/،

يعطيك العافية دانه بس بعد إذنك

للامانة القصيدة خالية من رووح الشعر يعني وزن وقافية فقط

الغر ض من القصيدة التعقيد اللفظي

بنت رجال وش ذا التحليل
وووووووووووين ناقدة موروث شعبي

هههههههههههههههههههههههه
قصيده جميلة وحلوه
بنت رجال محلله هاه
مشكورين ويعطيكم العافيه
تقبلوا مروري ودمتم بخير

ههههههههههههاي سلمان ليش وش فيهـ تحليلي ،،

طيب انت حللها ونشوف تحليلك يمكن نفهم عليه اكثرررر /،

ابو رشا ايوه محلله ليش عندك اعتراض<<بتخانق،،ههههاي

جد اذا تحليلي مااعجبكم طيب انتم حللوها يمكن يكون اوووضح/،

لا ماعندي اعتراض <<<< خايف هع
وتحليلك واضح ومافيه شيء
والان ننتظر تحليل الاخ سلمان >>> نكبات تايم - هع

دانه
يعطيك العافيه على النقل
وهذه القصيدة ليس فيها من الشعر ولا بيت

هذا تسمى بالشعر ((التعجيزي)) وغالباً مايصير فيه تحدي بين الشعراء سوى في قديم الزمان

او في هذا الزمن بس قليل جداً يحصل مثل هذا الشي

ودائماً يكون خلي من الصور الشعريه ولاكن يعتمدون على القافيه الصعبه والوزن التعجيزي مثل الكلامات النادره او تكرار الكلمات التى لها صله بالشعر العامي وحصل هذا الحدي بين
الشاعرين الكبيرين حبيب العازمي وفيصل الرياحي
(رحمه الله) بينما كان يعلبون في أحد ساحات المحاوره قبل
خمس أو ست سنوات وبدأ في البيت الاولى فيصل الرياحي
لكي يحرج فيه حبيب أمام الجمهور وهذه سياسة شعار المحاوره هذا كان الخصم كبير مثل حبيب وهو عباره عن بيت تعجيزي ولاكن للاسف ماني حافظ هذا البيت ولاكن من ذكى حبيب رد عليه ببيت تعجيزي ولاكن ليس على قافية فيصل ولا وزنه فطلب من فيصل يرد ولاكنه لم يستطع

عنه الحديث يطول اكتفي بالقدر هذا على وعسى ان يكون اصبت الهدف

تحيااااتي للجميع